(SPD Pathfinder Camporee Toowoomba 2015)
O se faamanuiaga tele i le toatele o alo ma fanau a le ekalesia Aso Fitu e malaga mai Samoa ma nisi atumotu lenei faatasiga a le Pathfinders, e pei ona usuia mai i Toowoomba i Kuiniselani.
Na tatalaina i le aso 6 o Ianuari ae toe tapunia i le Aso Sa aso 11 o le masina lava lea. O nisi o nai tamaiti o le uluai taimi lenei ua faagalogata foi le toe taliu atu i Samoa. Ua lē gata ina fefaamasinia‘i ai tupulaga ae o le tele o faamanuiaga faaleagaga sa folafolaina e lana auauna sa avea ma fofoga faapitoa o le faamoemoe ae o aufaipese foi, oka ua pei o pesega a agelu i le lagi lona logo mālie.
E tele faagaioiga ma taaloga aemaise o taleni sa faaalia i koneseti. Sa auai mai kalapu sueala (Pathfinders) mai Niu Sila, Fiti, Papua Niu Kini, Toga faapea isi atumotu o le Pasefika ma isi Setete o Ausetalia.
Sa malu puipuia le leoleoga a securities faapea susuga i faafeagaiga sa nafa ma le momoliina o tagata i totonu lava o le camp ona e fai a sina maomao ona o le toatele, lea sa gapatia ai nai faifeau Pr Ieti ma le faletua ia Alofa Ah Siu, Pr Tusitina faapea Tuuu Ierome ma le faletua ma nisi o faifeau ma toeaiina.
E ova atu i le valu afe ma ona tupu le faitau aofai o i latou sa auai i le faatasiga e pei ona maua i le resitala.
O le susuga ia Faafetai Matai (Samoa) ua faamanuiaina i le tofiga o le Faatonu o autalavou (Trans-Pacific Union Mission) e pei ona sui tulaga i le fonotaga o lenei foi paeaiga.
E toatele i latou sa faamanuiaina i le folafolaina o le Afioga Paia a le Atua e le Camporee Guest Speaker le susuga ia Pastor Eddie Hypolite. O loo galue nei o ia o se faifeau sinia i le Aoga a le ekalesia le Avondale College i Cooranbong Ausetalia.
Ua ta‘ape nei le toatele o le aufono i aiga e fai sina tafafao a o lei toe taliu atu i nuu ma alalafaga aemaise atunuu o le Pasefika na malaga mai.
O le viiga i le Atua auā ua moni upu ua tele lava tala ia manu ae itiiiti ia mala ina ua tau lau o le faamoemoe ma uli ma sao le aso sa taupoina.
