Sa maua foi le avanoa e faia ai se mafutaga ma le Ekalesia EFKS i Apolima
O le usuia ai o le fonotele a le Ekalesia LMS Toefutaina i Samoa i lenei tausaga 2014, o lona uluai taimi muamua lenei ua fono ai i laufanua o Samoa, talu ona faavae mai le Ekalesia i Samoa Niu Sila ma Ausetalia i le tausaga 1992.
O le tele o tausaga e usuia ai lenei fono e feauauai lava Niu Sila ma Ausetalia i nofoaga e faataunuuina ai. Ae peitai e le taofia e le Atua ni faamoemoega lelei e tutupu mai ma unaina ai pea le malosi o le fealofaniga o ona tagata auā e fanau mai ai le soifua faamafanafanaina ma le ola feagaleleia ‘I pei ona taua i le ulutala.
O le Aso Lulu, 27 o Aukuso 2014 i le 1pm na tatala aloaia ai lenei fonotaga i le faletalimalo o le Millania i Sogi. O le toeaina ia Apolima Tautaiolevao na taitaia le sauniga ma o ia foi o le taitaifono a le ekalesia L.M.S Toefuataina i le lalolagi. Na faatumulia lea sauniga i le mamalu o sui usufono mai Niu Sila ma Ausetalia, ona faagasolo ai lava lea seia aulia le taeao o le Aso Faraile 29 o Aukuso.
Ina ua mae‘a le sauniga lotu i le taeao o le Aso Farai le na tuua loa le Millenia ae malaga atu e tali le valaau faaaloalo a le EFKS Apolimatai i le tausi matagaluega ia Rev Tepatasi Tuala ma le faletua ma le mamalu o le ekalesia, ma faamae‘a ai ma le fonotaga i aso na totoe o le fono.
E le gata i lea ae o se fiafiaga i le alalafaga o Apolimatai i le tu maualuga i o latou loto ma finagalo a latou tamafanau po lupe faalele o loo galulue ma fitaituga i soo se tafa o le lalolagi auā le Atua ma lona finagalo.
O le susuga i le toeaina ia Apolimatai Tautaiolevao ma le faletua ia Fanaua Tautaiolevao o se tasi lea o lupe faalele o le afioaga ua mafua ai lenei mafutaga. Ae na saunoa le susuga i le toeaina ia Lui Tupai Tevaga, ina ua feiloai le LMS Toefuataina ma le EFKS a Apolimatai, sa ese lava lagona na oo mai, leitioa foi le fatu pese Eperu a faapea ane – O se mea ina matuā lelei lava o uso ae nonofo fealofani. Feiloai i le fiafia aemaise o le faafetai i le Atua ona o lenei avanoa ua tulaueleele ai i laufanua o Apolimatai, auā o le toatele o le auusufono mai Niu Sila ma Ausetalia, o le latou taimi muamua lea i Apolimatai.
O le mea masani lava e faamalumalu lava ma aiaiuli le aganuu i le Talalelei. Na mae‘a tulaga o le usu ma le ‘ava faatali ona faasolo ai lea o fuafuaga o le fono a le LMS Toefuataina i lena afiafi seia oo i le Aso Gafua, 1 o Setema ma tapunia ai loa le fonotaga.
Na momoli foi le faafetai tele a susuga i toeaiina o le Ekalesia LMS Toefuataina i le faafeagaiga ia Rev Tepatasi ma le faletua, susuga i le A‘oa‘o ia Tautaiolevao ma le Faletua, le mamalu o le Ekalesia EFKS i Apolimatai ona o tulaga faalupelupeina na faatinoina a o iai i le latou mafutaga.
O le maua ai foi o se avanoa o le sui o le nusipepa e talanoa ai ma le failautusi aoao o le ekalesia ina ua mae‘a mai le latou usugafono i Samoa, na fesiligia ai e tusa ma nisi o faasalalauga na agiga ai foi le Igoa o le LMS Toefuataina i luga o leitio ma le niusipepa, e pei ona faasalalauina i talafou mai Samoa i lena vaiaso ua tuanai e faapea o le Ekalesia LMS TOEFUATAINA ua suia le latou igoa.
Saunoa le failautusi, le faafeagaiga ia Lui Tupai, e lagona le faanoanoa o le loto ma faamalulu mai ai foi ia Samoa ma lana faafofoga mai, ona o le soona faatasina o le igoa o le latou Ekalesia e nisi tagata, ao lea e nonofo atu i latou tonu o loo umia faaletulafono le Resitala a le LMS Toefuataina i le Lalolagi.
O lea ala lea na ia toe faamanino mai ai le Resitala a le LMS Toefuataina i le Lalolagi i o latou tulaga tofi nei o le Ekalesia: Taitaifono – Toeaina Apolimatai Tautaiolevao (Papatoetoe Niu Sila); Sui Taitaifono – Toeaina Tele Tausaga (Blacktown, NSW Ausetalia); Failautusi Aoao – Toeaina Lui Tupai Tevaga (Blockhouse Bay Niu Sila); Teutupe – Toeaina Siutu Samoala (F.T Massey Niu Sila).
