Ua amata le tausaga ma galuega faataotooto a le Ekalesia Aoao a le Assembly of God Church of Samoa e aofia ai Ausetalia, Samoa ma Niu Sila nei. O lenei fuafuaga ua mae‘a ona fausia ina ua mae‘a le fonotaga tele a le Ekalesia lea sa auai uma mai ai sui usufono o ekalesia taitasi o loo auai i totonu o lenei faamalu.
O le aso 13 o Ianuari na amata gasolo ai lenei fonotaga tele a le Ekalesia (Tri Nation Church Conference) lea sa usuia i le Te Rauparaha Arena i Porirua. Na tumutumu lea hall i sui usufono uma mai Ekalesia e 7 mai le matagaluega i Samoa, o ekalesia e 20 mai le matagaluega i Ausetalia ma le 32 o aulotu i le matagaluega i Niu Sila nei, ae le gata i lea o nisi o Ekalesia eseese sa auai.
O se mafutaga mafana ma le matagofie a o militino faatasi le fanau a le Atua i le tufitaufaoina o faalumaga faaleagaga e ala i le upu faauuina a le Atua sa folafolaina e le Afioga i le Aposetolo ia Talosaga Kome ma nisi o taitai o matagaluega taitasi.
Sa faapea foi ona molimauina ni polokalame faaleagaga mai autalavou i ekalesia mai Ueligitone, ma o nei sauniga uma sa mafai lea ona faatinoina i po taitasi mai le aso 13 na gasolo ai le usugafono seia oo i le aso 17 o Ianuari ma tapunia aloaia ai le mafutaga. O le sini autu o lenei faamoemoe, “O le Fealofani, ina ia maua e tagata ma ekalesia uma le fealofani, e pei o le fetalaiga a Iesu, o ou soo moni outou pe a outou fealofani.” (Ioane 13: 34-35). Na maua foi le avanoa e aoaoina ai le upu a le Atua e nisi o le aufaigaluega ua iai le agavaa ma le meaalofa mai le Atua.
O le Aso Toonai na faataunuuina ai loa le fonotaga aoao a le Ekalesia, auā le faalelei o vaega ma itu tino uma o le galuega ma filifili ai tofiga mo le galuega. O loo tumau pea le taitai o le ekalesia aoao le afioga i le Aposetolo ia Talosaga Kome o loo galue i le galuega i Porirua i Uelgitone, o le failautusi o le Ekalesia aoao, ua filifilia ai le susuga le faafeagaiga mai Brisbane, Queensland ia Pastor Taeauga Ropati Frost.
O le toeaina o le Ekalesia aoao ua tofia ai le susuga le faafeagaiga ia Pastor Tulua Tau Peti mai le ekalesia i Vaitele Samoa, sui lagolago ua see atu ai Pastor Fereti Toleafoa mai Aukilani.
Ma o lenei fonotaga ua autasi ai finagalo i le paia o le nofo a faafeagaiga ma le mamalu o le au usufono e taitolu tausaga ma usuia fono a le Ekalesia Aoao, ina ia lava le taimi mo tapenapenaga a Matagaluega taitasi. Ua iai foi la le fuafuaga o le tausaga 2019 o le a talimalo ai le matagaluega a Samoa i le isi fonotaga tele a le Ekalesia Aoao.
