Usu faaaloalo le Tofa Saili i le faigamalaga Afioga Patele Faalelei Tapuala mai Samoa

E ui lava ina lē auai uma le toatele o le mafutaga ona sa tuatuagia i feau ma galuega, peitai sa faatino lava tu ma aga masani a le atunuu.
Na tauaofia le mafutaga i se latou fono faalemasina faatasi ai ma le ava o feiloaiga. Sa auai le afioga i le taitaifono ia Taefu Patea Taefu, faapea tapaau ma aiga ma le faafaleupoluga i le Tofa Saili.

O le fetalaiga ia Leuli Silifa‘i Anamani Logo (Samusu) o ia sa fai ma tootoo o le Tofa Saili auā foi le usu faaaloalo. Na tali fuaitau le afioga ia Patele e tusa ai foi ma faaaloaloga e ala i lana saunoaga faafetai i tapenaga uma aemaise le ava o le alii taeao ma le usu faaaloalo.

Na pati le agatonu poo le ava o le fesilafaiga auā le taunuu i fanua o le afioga ia Patele. O le folafolaina o le ava usu faaaloalo sa nafa lea ma le tofa ia Tapuala Taufaalelei.
O le afioga ia Tuutagaoleva Pulenuu sa feagai ma le sufiina o le ava, ae o le afioga ia Tuitumua Pio o ia lea sa tufaina le ava. O le fetalaiga ia Togia Taua‘i sa tautuina le ava o le alii taeao.
O le afioga ia Patele Faalelei Tapuala o ia o le tausi matagaluega ia Anitelea Paia i le alalafaga o Faleula.

O loo iai o ia i Kuiniselani ona o sana faiga malologa mo le fā vaiaso, ona toe agai lea i Fiti mo le isi 2 vaiaso a o lei toe taliu atu i Samoa.
O le fā ai lenei o ona masina i Samoa talu ona malaga atu i Fiti e pei ona a‘oa‘oina ai i le sefululima tausaga.
Na faauuina o ia e avea ma Patele i Samoa i le tausaga e 2006 ona toe taliu mai lea e faaauauina a‘oa‘oga i Fiti.

Na matagofie lea aso na atofaina e ala i le faatasi mai o le Atua. Na faapea foi ona auai le sui o le Fofoga Samoa mai Canberra, le fetalaiga ia Tavaa Tevita Sione (Siumu & Satapuala) o se malo faaaloalogia i lea aso. Na faaiuina i se taumafataga na tapena lava e le Tofa Saili ma taape ai le fuamanusina.