O taumafa e gaosia i Samoa e faaaogā i ai fua o laau tau faatoaga o loo maua lava i le atunuu e ao ona galulue faatasi ai le atinae o tagata tafafao ma le au faifaatoaga.
O le lava foi o fua o faatoaga e faaaogā i le gaosiaga o taumafa, tasi lea itu tāua auā e iai le vaitaimi na faaitiitia ai le fua o le laau o le tamato, ona aumai lea i atunuu i fafo o lea fua tau faatoaga.
Faaalia e le susuga Faamatuainu o le pulega o tagata tafafao, o le tāua lea o le fesootai lelei o atinae nei e lua ina ia faalagolago le tulisi i le au faifaatoaga mo le tautuaina o le fofoga taumafa o tagata tafafao ona lelei foi lea o seleni e maua mai ai. E to‘a 25 le au kuka poo i latou e gaosia taumafa i faletalimalo i lo tatou atunuu sa auai i se aoaoga na faamae‘a i le Aso Toonai na tea nei sa faatautaia e ni alii kuka tautaua mai Niu Sila ma Fiti.
O le autu o le aoaoga ia aoaoina o tatou tagata ua iai lea tomai faapitoa i auala e faaaogā ai a tatou lava taumafa faasamoa e tuu i ai nisi faiga faaonapo nei ina ia tosina ai tagata tafafao e tausasami ai. O le itu sili la ona tāua i lea faiga o le alumia ai o fua o faatoaga o loo maua i Samoa e pei o fualaau‘aina suamalie ma fualaau‘aina faisua.
O se taimi muamua lenei i le talafaasolopito o le atinae o tagata tafafao ua naunau ai le Malo e atinae le galulue faatasi o atinae e lua auā o le a faaaogā ai lava fua o a tatou lava faatoaga i le tautuaina o le atinae o tulisi.
Pau le tulaga o loo ave ai le tuualalo a le atinae o tulisi ia fesoasoani le Matagaluega o Faatoaga e unaia le au faifaatoaga e siitia le totoina o laau ina ia lelei o latou fua ma alumia ai i le tautua a fale‘aiga ma faletalimalo.
Faaalia e se alii mai Hawaii ae nofomau i Niu Sila o se sifi kuka, sa auai i le aoaoga o sona fiafiaga lea e lagolago le faamoemoe o le pulega o tagata tafafao ona o lea ua ia matauina ua naunau le Malo o Samoa e atinae lea tulaga lelei tele.
O sui o faletalimalo o nafa ma le saunia o taumafa sa auai foi e ese ai le au kuka a o le naunautaiga o lenei atinae ia aoaoina lelei tagata faigaluega e nafa ma lea matata auā o le a saga lelei atili ai le tautua i tagata tafafao aemaise lava i le fofoga taumafa.
Faaalia e le Minisita lagolago o tagata tafafao le afioga Tafua Maluelue, a lelei ona tapena i latou e saunia mea taumafa mo le au tafafao ai fafo, o le tauleleia foi lea o le atinae ma lelei ai foi le tala ave i fafo ma fiafia ai tagata mai fafo e tafafao mai i Samoa.
