O le tasi lea o polokalame na faalauiloa i le vaiaso ua ave ai le faatāua i le Tupulaga talavou o Samoa o le tetee atu i le tagofia o le ava malosi.
O le Fono a le tupulaga talavou e iai lona ofisa i le fogafalelua o le Nia Mall i Saleufi lea ua sau ai lenei faalauiloa ma ua agai ai e amata mai i le faaiuga o le vaiaso na tea nei ma faagasolo i lenei vaiaso i fale kalapu poo fale ava ina ia faalauiloa le tāua tele o le taofi o le inupia i tupulaga ma tagata matutua foi.
Ua faamauina le tele o solitulafono i Samoa i lenei vaitaimi ua mafua ona o le toatele ua lē mafai ona taofiofi le ava malosi. O le toatele ua maliliu i vevesi ua tulai mai ona o le ava malosi lava ma o le mafuaaga numera tasi lea o le maliliu o tagata o le atunuu i le vaitaimi lenei.
O le tele foi o sauaga i totonu o aiga e pei ona molimauina e leoleo, ua mafua mai lava ona o le inu o le ava malosi e i latou ua faia nei sauaga i taitoalua poo le fanau foi.
Na amata i le tausaga na tea nei le taumafaiga lenei a le Fono o Tupulaga talavou o se faalapotopotoga tumaoti ua galulue soosoo tau‘au ma le vaega o Talavou a le Matagaluega o Mataupu tau Tina ma Tamaitai, Atinae o Nuu ma Aga Fesootai, ina ia faalautele manulauti o le atinae o tupulaga talavou.
O le amataga o lenei faalauiloa ua fautuaina ai i latou o loo faafoe taavale e tuu i le fale pe a agai e tafafao i fale kalapu poo fale faafiafia ma e saili lava i totonu o fale kalapu nei i latou e lē o tagofia le ava malosi ina ia faafoeina taavale.
O se faiga ua vaaia lava le faamalosia e nisi o tupulaga ma o loo toatele lava foi o loo ua agai i le fale i taavale la‘upasese. O le toatele o loo faia lea solitulafono e pei ona ta‘ua e nisi o le tupulaga o tagata matutua ia e foliga mai e lē o usitai lava i le tele o fautuaga e aua le aveave pe a onā.
O le vaiaso na tea nei na faia ai toe sauniga o se alii e 53 tausaga le matua o Samauga ina ua maliu i se taavale na faafoeina e se tamā ua silia i le 70 tausaga le matua ma na lavea i Manase.
O le faaiuga o le vaiaso lenei na maliu ai se tina sa i le nofoa o le pasese i le pito i luma o se taavale totogi aso (rental car) ina ua taavalevale i tua o le auala i Gagaifo i Lefaga. O lea foi faalavelave o loo masalomia ai le faasuaava o le tamā o le aiga na faafoeina le taavale.
E ui i ia lipoti o loo faamalosia pea le taumafaiga ina ia tamau i tupulaga le leaga o le ava malosi e lē gata la i faalavelave tau taavale ae faapea foi vevesi ua tulai mai ai.
Faaalia e Eric Poe o loo faauluulu i ai le Fono a le Tupulaga a Samoa o le a faaauau i tausaga uma lenei faalauiloa ma ia taumafai lava ina ia faaitiitia lenei foi faafitauli ua feagai pea ma tupulaga talavou o le atunuu.
