E lē o se mea fou le faia o faatoaga faalenatura (organic farming) ae o le faama‘ia o eleele o Samoa ua matauina ua mafua lava ona o vailaau na taumafai e tineia ai manu faalafuā ma aafiaga o siama ua feaveai e le ea e pei o le lega ua afaina ai le tele o fua o faaeleeleaga a Samoa.
O lea la ua toe agai le Faalapotopotoga o Tamaitai fai pisinisi o Samoa, ina ia mafai ona toe agai le atunuu i le auala na sau ai amata mai lava i le faapalaga o otaota ma taumafa ina ia mafai ona maua le faalelei eleele i togalaau‘aina, togalaau faisua ma isi fua o faatoaga i Samoa.
E o lua lava aoaoga o loo faagasolo i Samoa i lenei vaitaimi. O le aoaoga muamua lea ua silia ma le masina o faagasolo o loo faatino e le vaega o suesuega o fua o faatoaga i Nuu.
O le vaega lea a le Matagaluega o Faatoaga ma Faigafaiva, ae o loo faasaga mai i le isi itu o le nofoaga lea, o se isi foi nofoaga ua faatautaia ai faatoaga a le Faalapotopotoga lea e ta‘ua o Tamaitai Faipisinisi o Samoa (Women in Business Development). O i latou nei o loo unaia oloa poo fua o faatoaga ua gaosi ma totō e aunoa ma le faaaogāina ai o ni vailaau.
O le vaiaso na tea nei ma le vaiaso lenei ua valaaulia ai fai faatoaga ua lesitala i lalo o lenei faalapotopotoga mai i Upolu ma Savaii ina ia toe faamanatu ma faalauiloa le tāua o le faatinoga o faatoaga ua faia faalenatura.
O le tulaga mautinoa lava ua malosi le unai o fua o faatoaga ma oloa ua gaosi faalenatura i atunuu e pei o Niu Sila, Ausetalia atoa ai ma Amerika ae o Samoa o lea faatoa amata unai ai nei faalauiloa e ui ua tele tausaga o faamamalu e le faalapotopotoga lenei lea tulaga. O lona togalaau tele la i Nuu lea na agai i ai le asiasiga ma le aoaoga ua faia mo ona sui. O le taimi lenei ua oo atu i le to‘a 600 fai faatoaga ua lesitala i lalo o le Faalapotopotoga lenei ona o le itu lea o ai lava e lesitala e matuā faasā lava ona faaaogā ni vailaau ia latou atinae.
O le unai o lenei aoaoga ina ia faatuputupulaia le fiafia o le tupulaga talavou e faatino nei ituaiga atinae ona o le toatele lava o faifaatoaga e foliga mai e unai e tagata matutua. O lea la ua valaaulia ai le tupulaga talavou o aiga fai faatoaga nei ina ia agai i latou e faaauau lenei taumafaiga.
Faaalia e Faumuina Felolini o le sui sooupu o lenei Faalapotopotoga, e ese le tele o le aogā o lenei aoaoga aemaise o le tufa atu ai o fatu o laau mo tagalaau faisua ina ia amata ona totō ma amata ona vaai faalelei mo le agai atu lea i le taligamalo tele a Samoa mo atunuu laiti tau atiae o le lalolagi le SIDS lea e fai mai i Samoa i le masina o Setema.
O le taimi lenei e iai le polokalame a le faalapotopotoga lenei ua ta‘ua, mai i le faatoaga i le laulau‘ai, o se taumafaiga ua fesootai ai faifaatoaga o le Women in Business ma faletalimalo i totonu o le atunuu faapea fale’aiga tetele ma avatu iai fua o togala’au faisua ma fua o laau aina e faaaoga ia latou taumafataga o loo faatau atu i tagata asiasi mai ma tagata lautele o le atunuu e agai i fale‘aiga.
Faaalia e Faumuina, afai e totō loa i le taimi lenei laau nei ua avatu i le faalapotopotoga, e fetaui lelei le faaaogāina o nei taumafa ma taimi o le fono tele e pei ona ta‘ua. O le faapalaga ua agai i ai le faalapotopotoga ina ia faamausali ai faalelei eleele i le tupulaga ma a latou atinae ma na faaalia e lenei tamaitai ua toatele le tupulaga i lenei aoaoga ua amata vaaia le manao e faaauau e i latou atina’e a o latou matua ma o le malamalama lava na mana’omia ina ia mafai ona tausi nei togalaau ma lē mafai ona tali atu i taimi e pepesi ai faama‘i ia ua faaaogā ai lava vailaau i totonu o le atunuu.
O i latou uma ua lesitala i lenei faalapotopotoga e mafai ona faatau atu a latou fua o faaeleeleaga mo lenei faamoemoe. O le taimi lenei o loo faatau foi ato o fua o faatoaga mai i lea faalapotopotoga. Ma e iai le eseesega i le vaaiga i nei oloa o faatoaga ma fua o faatoaga o loo faaaogā ai le vailaau, e laiti atu fua o laau o loo fafaga faalenatura ae o lona tau e maualuga atu nai i lo le tele o fualaau faisua ma fualaau‘aina o loo totō ma le fesoasoani a vailaau e pei ona ta‘ua.
