Talu ona faatu le asosi o tamoega ma isi taaloga o tuuga i totonu o Samoa, ua vaaia le alualu mālie i luga o ana taumafaiga.
O se asosi ua tau aoao solo mai tama ma teine talavou ina ia tauva ai, ma o i latou ua vaaia le alu i luma o le saoasaoa i le tamoe, le aau ma le alu i le uila vili vae, ua iai nisi ua amata nei ona agai i fafo mo tausinioga faavaomalo.
O se taulai lea i le afioga Afoa Seti Afoa, o le Peresetene o nei ituaiga taaloga i totonu o le atunuu ma o se tamalii ua tinou e faatino miliga poo tauvaga i soo se itu o le atunuu ma valaaulia ai tagata mai i fafo ina ia tauva.
O lea ua faalauiloa se taamilosaga o le a faagasolo i lenei tausaga e lea asosi ma ua tutu faatasi ai ma le kamupani o loo faatau atu le kesi fai meaai i Vaitele le BOC Gas ina ia lagolagoina.
E $10,000 tala Samoa na tauaao atu e lenei kamupani i le asosi o tamoega ina ia mafai ai ona amata le faagasologa o lenei taamilosaga.
Faaalia e Afoa Seti o le tausinioga lea na faagasolo i le masina o Ianuari na faia ai se tuuga tamoe taamilo i Falefa, na vaaia ai fanau e oo lava i le 11 tausaga le matutua na tauva ma o se tuuga na manumalo ai se tama talavou e 14 tausaga le matua ma ua ia mautinoa nei le toatele o le fanau laiti a le atunuu ua iai le fiafia i le tamoe ma o iina lea ua amata ai nei tausinioga nei e amata atu lava ia Mati seia oo ia Iulai ona vaavaai lea i le faaauau i Samoa poo le unai loa le faaiuga o le tausaga e agai ai le au tamomoe mo atunuu mamao ma taamilosaga o loo faatino ai.
O tuuga nei ua na o tamoega faamalafoni ae ua lē aofia ai nisi o tuuga ua fuafua e le asosi lenei o tamoega e faaaopoopo i ai ana tausinioga faaletausaga e pei o le afa iron man – o le triathlon lea e aofia ai le aau ma le viliina o le uila vilivae atoa ai ma le tuuga na o le uila lava ma le tamoe.
O le faamoemoe o lenei asosi ia saga unai fanau laiti e amata ona toleni ai i taaloga tetele faapenei ae ua iai lava foi tausinioga ua na o fanau laiti ua fuafua e faatino ai.
Faaalia e le pule o le BOC Gas i Vaitele o se taumafaiga tāua tele lenei i le soifua maloloina o le toatele o tupulaga e tauva aemaise o le unaia foi o lenei faagatama e foliga mai e laititi lava le numera o le atunuu e agai e tausinio ai ma o sauniuniga a i latou ua aofia i lenei asosi mo taaloga o le Pasefika i Papua Niu Kini o se tasi lava lea o auala ua saga faamalosia ai le vave amata loa o nei tausinioga mo tamoega mamao.
