Talu ona tulai mai le faigamalo a le Labour i le taimi nei, o lea ua faasavali ai se polokalame a le matagaluega o aoga e soalaupule ai ma le atunuu atoa, i mea e ao ona faatāuaina i suiga ma teuteuga ua fuafua e le malo i le tulafono tau i aoga. O le talosaga a le afioga i le Minisita o tagata atumotu o le Pasefika ia Aupito Su’a William Sio i le minisita o aoga ma ana Minisita lagolago, poo iai se sao mo tagata Pasefika? Ae na tali le Minisita lagolago ia Jenny Salesa o lea ua fuafua ni fonotaga ia Niu Sila atoa.

O Aukilani o lea ua amata mea i fonotaga nei e pei ona ta’ua e le afioga i le tamaitai Minisita, lea ua fuafua e faia le isi fono i le afiafi o le Aso Lua 10 o Iulai i le Kolisi o Otahuhu mai le 6 i le afiafi seia paia le 9 i le afiafi, ae o le itu i Sisifo o Aukilani e faia lea i Kelston Boys High School i le taimi lava e tasi. O fuafuaga o nei fonotaga o le a tatala ai le avanoa i le atunuu e faasoa atu ai poo ā ni vaega e tatau ona manaomia i totonu o aiga.

I le saunoaga a le afioga i le Minisita ia Hon Aupito Su’a William Sio, na ta’ua ai e le matagaluega o aoga, e tele fonotaga lautele sa faatino a le matagaluega o aoga, ae e lei iai se leo o tagata Pasefika na aliali a’e ai i luga, ae na ta’ua e Aupito e mafua ona le aliali i luga se leo o le Pasefika ona e le o mafai ona agai atu i le nofoaga o iai tagata Pasefika.

O le naunautaiga a le malo faapea le afioga i le Minisita, ina ia siitia le tulaga o aoaoga i alo ma fanau a le Pasefika. O le tāua ma le lelei o nei faatalatalanoaga, ina ia mafai ona faaali sao mai e mātua le vaega e tatau ona lelei ai o tatou tamaiti. Pei o le gagana e faaaogāina i totonu o aiga ma aoga, ae afai foi sa iai ni mea na tutupu i totonu o aoga i le iva tausaga ua tuanai, o le taimi lelei foi lea e faailoa mai ai i le Minisita ia faaletonu o loo iai.

I le faigamalo ua mavae atu nei, na aveese ai e le faigamalo le faatāuaina o gagana ma aganuu i totonu o le Pacific Education Plan. O le Pacific Education Plan, o se fuafuaga ua faataoto a le matagaluega o aoga, ina ia manuia ai tamaiti aoga o le Pasefika, e ala lea i le faatāuaina o gagana ma aganuu.

O isi ia vaega tāua e ao i mātua ona talatalanoa ma faasoa iai i avanoa ia ua maua atu, ina ia mafai e Faipule ma Minisita ona toe talatalanoa iai auā le teuteuina o le tulafono ma le teuteuina o galuega faatino i aoga, a’o la e iai se sao o mātua. E moni lava la o Niu Sila lea ua iai i le faaaogāina o le gagana Peretania, ae ao foi ona tāua le faaaogāina o le gagana a le tatou atunuu, i le a’oa’oina o tamaiti i mea tāua o le soifuaga o tatou atunuu e ala lea i tala faasolopito a Samoa ma le Pasefika.

Lea la ua amata ona faagasolo fonotaga nei e valu i totonu o Niu Sila, e pei ona muamua atu i Akilani ma faasolo atu ai i isi pitonuu o Niu Sila. O le sini autu o nei faatalatalanoaga, ia mafai ona maua e tamaiti le atamamai ma le poto, ina ia iu mai aoga ma maua ni latou faailoga tāua ina ia maua ni galuega lelei.

I le talitonuga o le afioga i le Minisita ia Hon Aupito Su’a William Sio, a lelei le matagaluega o aoga i le faatinoina o le latou galuega e fesoasoani ai i o tatou tamaiti Pasefika, ma e le taumate le oo o nai tamaiti i se tulaga lelei ma le tulaga maualuga.

E tatau foi i le matagaluega o aoga ona ave le faamuamua i aoga i Saute ma Sisifo i le nofoaga o loo tumutumu ai fanau aoga a le Pasefika.