Ua alu le vaiaso ua mavae atu nei o faasolo polokalame eseese a le Matagaluega o Aoga Taaloga ma Aganuu i aoga maualuluga ma aoga tulagalua. E lē gata o aoga a le Malo ae o ekalesia ma aoga tumaoti ua opogi le vaiaso o le faitautusi, o fagogo, ma tusiga solo.
E auauai fanau e faitau mai ni tala poo ni solo ae o faiaoga e faamatala fagogo o le isi lea vaega sa sili ona popoto ai fanau i aso ua mavae. Talu nei ona lē toe faia ia vaega tāua o le olaga aoaoina o le fanau, ua molimauina le solo i tua o le faitautusi, ae ua mativa foi mafaufauga o tamaiti i upu e fau a‘i solo pe faamatala ai ni fagogo.
O le luitau a le taitai o le Malo le afioga i le Palemia i fanau ma faiaoga faapea matua, ia faia le tiute sili mo le lumanai o fanau a le atunuu. O le sini o le vaiaso o le faitautusi e atamai ai, Read to Succeed.
O se autu na faaamatalaina e le pule sili o le matagaluega o aoga a le Malo e tāua ma sa‘o auā o le mafuaaga lea o le toe fafagu ma faaolaola le faitautusi ona o le fatu lea e agai ai le mafaufau o le tama ma le teine i le ausia o se atamai lelei mo ia.
O le kamupani o le Samoa Stationeries and Books poo le SSAB e pulea ma umia e le faletua o Fiti Leung Wai, o le lagolago autu lea o lenei polokalame. Ua faaopoopo i ai ma nisi o faletusi i le atunuu e pei o le faletusi faamanatu o Nelesoni. Fai mai le faletua o Fiti o le faatāua foi lea a lana pisinisi e aumai tusi faitau sili ona aogā ma tāua mo suesuega a fanau i lona naunautaiga o le ki lea i le atamai.
O le molimau a le pulega o le faletusi faamanatu o tusi i tagata ma fanau e o atu e faitau tusi pe saili ni tusi mo suesuega o a latou mataupu, ona ua telē le suiga o nei aso. Ua iai fesootaiga televavave ua maua ai faamatalaga ma ua tele ina fiafia fanau e faaaogā.
Peitai o loo sili ona ‘oa tusi o loo iai i le tautua a le faletusi mo fanau ma soo se tasi e fia sailiili i mataupu eseese o le poto salalau.
O le unai foi lea a le Matagaluega o aoga ia toaaga faiaoga ma fanau e faamalosia le faitautusi auā o le molimau a le toatele sa aoaoina i lea faiga sa iai i tausaga ua mavae, e sili atu le tele o mea tāua o loo maua i totonu o tusi.
