Unai e Sonny Bill le Lakapi Liki i Samoa

E fai o le timuga o le taeao o le Aso Gafua, e lei faaitiitia ai le lolofi atu o le fanau i le Kolisi a le Ekalesia o le Au Paia o Aso e Gata Ai i le taumafai o le toatele ina ia oo atu ma feiloai i le alii lakapi liki, faipele ma le lakapi iuni foi o Sonny Bill Williams.

O loo i Samoa lea foi alo ua faasino ia Niu Sila ma Samoa nei, ina ia tau faamautu le polokalame tau atia‘e o le taaloga o le Liki lea ua faagasolo nei i Samoa ma isi atumotu tuaoi o le Pasefika.
O le Aso Gafua lea na tatala aloaia ai lenei pokalame tele. O se polokalame ua faaalia le faafiafiaina o le Faalapotopotoga Faavaomalo o le Lakapi Liki i taumafaiga a le Lakapi Liki a Ausetalia ina ia unai le taaloga e ala i polokalame tau atia‘e i atumotu o le Pasefika. O Fuafuaga faataatitia mo le Pasefika a lenei taaloga ua ta‘ua e le Taitaifono o le Lakapi Liki faavaomalo, o Nigel Wood o le a mautinoa le saga faamalosia ai o lenei taaloga i totonu o atumotu e pei o Samoa.

O le malosi o le sao o le Pasefika i lenei taaloga, e pei ona ta‘ua e Wood na manino i le taamilosaga o le Ipu o le Lalolagi i Peretania i le tausaga na tea nei e pei ona vaaia ai le toatele na mulimuli i taaloga a le Pasefika.
Ua ofi atu foi le ‘au a Samoa le Toa Samoa i le taamilosaga o le Four Nations poo atunuu e fā o le itulagi ma ua faaopoopo mai foi le numera o atumotu o le Pasefika ua vaaia le faamalosia o a latou asosi lakapi liki.
O le polokalame la lenei ua tatala aloaia i Samoa i lenei vaiaso, ua faamautu ai loa ma polokalame e pei ona ta‘ua auā le atiina a‘e o le lakapi liki e amata mai lava i aoga a le fanau laiti.

O le malaga mai lea a le alii lakapi liki lauiloa o Sonny Bill Williams i Samoa, o se taumafaiga ina ia saga faalauiloa lenei taaloga ma faatosina mai fanau o loo i aoga eseese i le atunuu e faamalosia ai lenei taaloga. E lē gata i lea ua faapea foi ona saga faamalosia ai kalapu o loo tausinio i le taimi lenei i taamilosaga o le Liki i totonu o le atunuu.

O polokalame faalauiloa o le vaiaso atoa na tatala i Pesega ma le faamoemoe e faagasolo i isi itu o le atunuu. Sa faapea foi ona talimalo le Asosi o le Lakapi Liki i sui o le Lakapi Liki a Ausetalia ua malaga faatasi mai ma SBW i lenei vaiaso i faafiafiaga ma se taumafataga na faapea ona faatautaia i le Ofisa o Tagata Tafafao maimoa mai i fafo i Apia ma o se avanoa ua feiloai atu ai foi le atunuu i lenei alii ua lauiloa ai foi Samoa i atunuu e fia o le lalolagi e le gata i le lakapi Liki ae faapea foi i faipelega ma le lakapi Iuni.
Sonny Bill i Samoa, a o feiloai atu i fanau aoga e faalauiloa le lakapi liki