O le aso ananafi na amata ai se aoaoga ua faagasolo nei i le Matagaluega o Leoleo i Apia. O lenei aoaoga o se taumafaiga a le Komesina o Sulufaiga ma lona ofisa ina ia faamalamalama ia i latou o loo aooga e avea ma malu o le Malo, le tāua tele o le iloa ma le faamalosia o aiātatau faaletagata i le faatinoga o a latou galuega.
O i latou nei ua fai i ai lenei aoaoga e manatu le Komesina o Sulufaiga, e tatau ona amata mai ai le galuega faa leoleo, ina ia mautinoa a iu i aoaoga nei ua manino foi i le faatautaiga o o latou tiute aemaise le feagai ai ma tagata ma le va nonofo ai lava o i latou i totonu o le Matagaluega.
Ua silia i le lima tausaga talu ona faamalosia le agai o suesuega i tagi ma faitioga ua faia faasaga i le Matagaluega i le ofisa o Komesina o Sulufaiga. O le tele o mataupu ua laga lava i faitioga mai i totonu o le Matagaluega ma o tuua‘iga ua aafia ai le aiātatau faaletagata faigaluega. Ua tele suesuega faapea ua faia ma ua tele foi faauluuluga o le matagaluega o Leoleo ua aafia ai ma ua faamuta ai lava auaunaga ona o auala ua o latou uia e faatino ai o latou tiute faaleoleo.
O le aoaoga la lea ua faatautaia i lenei vaiaso o le taumafai o le Ofisa lea a le Malo ia unai ia i latou o le a avea ma leoleo le tāua tele o le faia o galuega i lalo o le tulafono ma ia aua ne‘i oia le aiātatau faaletagata i le faatinoga o galuega.
Faaalia e le Komesina o Sulufaiga, ia Maiava Iulai Toma, o soo se tasi lava e ave i ai malosiaga e pei o Leoleo e faigofie lava ona galo ai le faamalosia o le aiātatau a isi tagata lautele ma e tatau ona matuā manino ai leoleo i lea tulaga ina ia aua ne‘i tulai mai ai nisi faitioga i le lumanai.
O loo tele atumotu o le Pasefika o loo faia suesuega i auala ua faaaogā ai e leoleo o latou malosiaga e faia ai a latou suesuega ma ua aafia ai le soifua o le tele o tagata lautele. O lipoti nei na ta‘ua e le ofisa o le Komesina o Sulufaiga, e leai se faamoemoe e sosolo mai i Samoa ae ua iai lava lipoti ua aafia ai leoleo i mataupu faapea.
O le faafetai a le Komesina o Leoleo ia Egon Keil ona o le mafai ona maua lenei avanoa aemaise o le amata mai ai o i latou e lei amata tiute faaleoleo ona o se amataga sili lea o le maua o galuega ae ua malamalama alii ma tamaitai i le faatinoga. O le vaiaso atoa lenei o loo faagasolo ai lenei aoaoga.
