Umusa maota tele EFKS Sapapalii, Mataniu Feagaimaleata

Ua toatele tagata ua lē fefefe i le oti ae ua fefefe i le tele o mea fai. O se tasi lea o mau a le faafeagaiga na taitaia le sauniga na tatala aloaia ai le galuega tele o le hall a le ekalesia EFKS i Sapapalii lea ua faaigoa o “Mataniu Feagai ma le Ata”, o le uluai taeao o Samoa i le talalelei e pei ona taunuu i le afioaga uluai misionare o le lotu LMS.
O se galuega e na o le fitu masina na faatino ai e pei ona fausia e le konekarate faufale mai Saina o le Qing Dao Construction i le tau e tasi le miliona tolu selau afe ($1.3million). E taugata le galuega ona a vavaai i totoga na fausia ai, o uamea ma sima faapea paipa uamea.
O le mau a le taitai o le sauniga le susuga i le toeaina, Solomona Tuatagaloa o le EFKS a Lalomalava, e iai aiga o le nuu na malepelepe ona ua faaletonu le tamaoaiga i le itu tau tupe ona o le galuega.
O nisi o le nuu na iai le loto lē fiafia ona ua mamafa le avega ma ua lē mafai ona faatino nisi fuafuaga. Peitai na faaaogā e le taitai o le sauniga se tala faatusa i le alofa o le tamā i lona toalua ma lana fanau.
Na faatau uma lava mea e mananao i ai e pei o taavale taugata, o fale lelei ma meaai. Peitai o le tala a le tina i lona toalua e lē o atoa le alofa o le tamā ona e lē o vaaia i aso uma ona foliga i le aiga. Tele ina alu moe solo ma mafuta ma isi tagata ma ana uo ae tia‘i lona aiga. O le tala la a le tina a vaaia loa foliga o le tamā i aso uma ona atoa lea o lona alofa.
E faapena foi i le nuu ma le ekalesia i Sapapalii, e lē atoa lo latou alofa i le Atua pe a lē auai o latou foliga i le faatinoga o le galuega lea ua mae‘a ma ua umusa. O le susuga Papalii Li‘o Taeu Masipa‘u o le sui faipule foi o le itumalo o Faasaleleaga Numera 2, na faia le tala o le galuega auā o ia o le teutupe.
Na ia tolaulau ai foai ma tupe sa maua i sailiga seleni auā le faamoemoe o le hall. O le mafutaga a Ausetalia e $113,660 tala le latou foai tupe. O le mafutaga a Sapapali i Brisbane e $36,000, o Aukilani e $30,000, Leitiofoni i Samoa e $186,000, ma le lima mafola o le ekalesia i Sapapalii e $90,080 faaopoopo i ai ma le $70 afe ua totogi ai se vaega o le aiatalafu e $475,000 i le  faletupe o le NZ.
O le fitusefulu afe lea o le pasene o le tului i masina e fitu a o faagasolo le galuega. O le isi sao o le ekalesia lava i Sapapalii o le $70,000 na amata ai le leitiofoni sailitupe na faia i le masina o Tesema o le tausaga ua mavae 2012.         O loo iai le aitalafu o le galuega e lei mae‘a ma e ta‘ape le mamalu sa auai e lei mae‘a ona faamaopoopo le aofaiga o lo latou aaomafola e ala i meaalofa tupe.