Umusa Maota o Faafeagaiga a le Metotisi Otara

Rev Iosia Tiatia Faleupolu ma le faletua ia Ruta Faleupolu ma le Matagaluega Ekalesia Metotisi Otara
Rev Iosia Tiatia Faleupolu ma le faletua ia Ruta Faleupolu ma le Matagaluega Ekalesia Metotisi Otara

O le Ekalesia Metotisi i Otara, o loo tausi matagaluega ai le susuga i le faafeagaiga ia Rev Iosia Tiatia Faleupolu ma le faletua ia Ruta Faleupolu, e silia i le 40 matafale poo aiga lotu o loo galulue ai, ma o se tasi foi lenei o matagaluega tele i totonu o le faasinoti a Aukilani i Saute i totonu o Niu Sila.

O le toe fausiaina o le maota o le galuega i le tausaga ua tuanai o se galuega tele ma se maota sa fuafuaina e le aulotu ma le susuga i le faafeagaiga, ma o lea sa toe tuuina ai i lalo le fale tuai ae toe fausia le isi maota fou e pei ona umusaina.

O le taeao o le Aso Toonai, sa tumutumu ai le lotoā o le ekalesia lenei i Otara i aiga, uo aemaise o faasinoti e lua i Aukilani e molimau le tatalaina o le maota fou lenei o le galuega. O le taitai o le sauniga o le susuga i le Sea o le faasinoti i Aukilani i Saute ia Rev Masunu Utumapu, ae o le faletua o le Sea o le faasinoti i Aukilani i Matu ia Faapaia Oianatai Matale na ootiina le lipine.

O le tala o le fausiaina o le galuega na saunoa i ai Rev Iosia Tiatia Faleupolu, ma na ia ta‘ua ai o lenei galuega na amata e leai se tupe, ma sa latou savalia ai le faletupe mo se fesoasoani, aepeitai e lei talia le savali, na toe sui le auala sa uia ma maua ai le aveai mai le Trust Fund a Loia, ma faamatuu mai ai le tino i tupe e $760,000.00 mo le fausiaina o le galuega.

E mae‘a le galuega e lei uma le tupe na tuuina mai, ona sa iai nisi vaega o le maota sa galulue ai lava le Ekalesia mo le faatinoina, sa saili i tausala le aulotu, sa fai bingo a tina auā lava le taumafai i nisi o auala e faamāmā avega ai mo le galuega. E lei faalogologo tiga tamā ma tina matutua seia oo lava i fanau sa galulue ma finau seia oo ina tau lau o le faamoemoe, auā o masina uma e silia i le $10,000 le tupe maua mai i Bingo. E $887,000.00 le tau atoa o le galuega pe a tuufaatasi ai ma vaega o le fale sa faatupeina lava e le aulotu.

E tasi le tausaga ma masina sa faatinoina ai lenei galuega, ona sa umi se taimi na taofia ai e le Transpower, ona ua fai si maualuga o lona fausaga, e ui i lea faafitauli sa tulai mai ae lei nofonofo ai lava le susuga le faafeagaiga ma le ekalesia i le finauina pea o lenei galuega seia oo lava ina mae‘a.

Na sosoo ma le taumafataga, ma o le tofa ia Taatiti Filipo o le aao tusitusi o le matagaluega sa fai ma fofoga o le aso, ma o ia foi sa tutootoo i faaaloaloga, ae o le tofa ia Fata Pine o le sui o le kimiti tumau sa tasi iai le faafitiga o aleaga o ia e fai ma sui o le auvalaaulia ma faasinoti e lua e molimolia le faafetai e tusa ai ma pelega o le aso.