A o gasolo ai le fono tele a le Ekalesia Faapotopotoga Kerisiano a Samoa mo lenei tausaga, ua tatala le maota o le pulega a Melepone i Matu mo lona faaaogāina.
O lenei galuega tele na sao tupe uma i ai aulotu e 6 o loo i lalo o le faamalumaluga o le pulega a Melepone i Matu.
O le sauniga i le faaiuga o le vaiaso na potopoto uma ai sui o le Ekalesia ae faapea foi le pulega e tatala lenei galuega tele, ma o le a faamautu uma i ai aulotu o le pulega auā foi le fonotele o lenei tausaga aemaise le agai ai i luma.
E ese foi le fausaga o lenei fale mai fale o isi pulega o loo faaaogāina i le taimi nei. E iva potu moe ma isi potu mo malologa ma taumafataga aemaise ai le gasesega o taumafa.
Ta‘ua e le matai tufuga, o se galuega sa sologa lelei peitai sa iai foi nai faafitauli. E $284,000 tala ana amata fausia ai lenei galuega peitai o le tele o isi faaopoopoga na oo ai lava le tau o lenei galuega i le $370,000.
O nisi o luitau o lenei galuega o le fai ma taofi se‘i maua lelei se fesootaiga ma aulotu ae o lea lava na mafai ona faatino i le finau ai o sui a aulotu eseese o lenei pulega.
O le alii pule o le Kolisi Faafaifeau i Malua ia Rev. Dr Afereti Uili, na taitaia le sauniga e tatala aloaia ai lenei galuega ma faafetai le ola tautua lotu, le ola finau o aulotu nei e 6 ua tino mai ai lenei galuega tele.
E 18 masina na faia ai le galuega lea la ua mae‘a ma ua tatalaina ai loa mo lona faaaogāina auā foi le fono tele a le Ekalesia. O le konekarate a le Seiuli John Sila and Sons Construction na fausia lenei galuega tele.
Ua talafeauga lelei foi le mae‘a o le galuega ma le gasolo mai o le Fono Tele o le Me a le Ekalesia lea e amata gasolo i le vaiaso lenei.
