Na matuā lolofi atu i le malae i Otahuhu Rugby Club i le faaiuga o le vaiaso le toatele o paaga masani a le Iuni lakapi a Aukilani Samoa faapea foi le tapuaiga a le tele o afioaga o loo auai o latou ‘Au i lea taamilosaga, i le uluai vaiaso o lea taamilosaga na faafuaseia ona suia mai i le kalapu a Otahuhu ona o le faaletonu o loo iai pea Aorere Park lea e masani ona faataunuuina ai lea taamilosaga i tausaga uma.
Ma e siisii atu pea ina faatumulia lea taamilosaga i tausaga taitasi, faapea foi le vaaia o le maopoopo o Au a afioaga i tausaga uma. O le afiafi ananafi poo le afiafi o le Aso Gafua, 25 Aukuso, na talo ai se fonotaga a le Aukilani Samoa i ni mataupu tāua e lē taumateina, o le iloiloina lea o nisi o Au sa faauluina mo le taamilosaga e pei o Kalapu a Faleolo faapea foi le Kalapu a Otara Rising Star, faatasi ai ma nisi o mataupu mo le faaleleia atili pea o le taamilosaga o lenei tausaga 2014.
Matagofie se vaaiga i le malae i lea aso i le taufaipati atu o le atunuu e maimoaina le taamilosaga i lona amataina ae faapea ai foi le taualugaina o taaloga i le taaloga o le talita i le va o Kalapu malolosi mai le motu tele i Salafai i le va o Safotu o loo umia le talita, lea sa lu‘iina e Iva mai Faasaleleaga.
O se taaloga mataina ma le matagofie, ma na molimauina ai le tamaoaiga ma le agavaa o alii taaalo mai ia afioaga e lua. O se tasi o vaega manaia i le vaavaai i lea aso o le matagofie o togiga a Au eseese o le taamilosaga, lelei atoa le faafoeina e le Komiti o taaloga i le uluai vaiaso o ia taaloga ma le faamoemoe e sili atu foi se vaaiga i lenei vaiaso nai lo le vaiaso talu ai.
Ina ua mae‘a uma taaloga i le uluai vaiaso, o iina na maua ai le avanoa e filiina ai le Au ua faaigoaina o le Auckland Samoa Team of the Week ma o se vaaiga la lenei i le Au.
AUCKLAND SAMOA TEAM OF THE WEEK
Forwards
Faaumuumu Maelega – Marist
Taimo Mata‘u – Laumua o Tumua
Brian Asiata – Laulii
Alex Vaai – Safotu
Sione – Malie
Puppy Farrel – Nations
Laga Faasavalu – Apia
Filiga Sene – Iva
Williesone Siaosi – Nofoalii
Tua – Otahuhu Warriors
Backs
Willie Alai‘asa – Nations
Simon P. Toleafoa – Marist
Tike Laki – Apia
Liaga Tema – Iva
Laasia Paulo – Laumua o Tumua
Maelega Esera – Safotu
Monty Punatai – Laulii
Laupepa Sale – Nofoalii
Gentle Tapua‘i – Malie
Brian Afa – Otahuhu Warriors
Se vaaiga i iuga o taaloga
Pool B
Apia Maroons 18 – Laulii 15
Sataoa (Malo Fua) – Otara Rising star
Saleimoa (Malo Fua) – Faleolo
Marist 61 – Lupe o Soaga 3
Pool A
Nations 39 – Nofoalii 12
Auckland Reds 40 – Malie 15
Laumua o Tumua – Afega 19 – Otahuhu
Warriors 0
Safotu (Shield) 17 – Iva 28
