Uluai taamilosaga Tapolo a Malisi Aukilani

O le faatama afioga Lemalu Ray Ah Liki (lona lua mai le itu taumatau) faapea sui o le Malisi Aukilani
O le faatama afioga Lemalu Ray Ah Liki (lona lua mai le itu taumatau) faapea sui o le Malisi Aukilani

Ole Aso Toonai ole vaiaso nei 25 o Iuni, ole a faataunuuina ai le uluai taamilosaga tapolo ale Malisi Aukilani ile malae tapolo ale Aviation Country Club i Magele. Na afuafua lenei taamilosaga ina ia avea ose taamilosaga e patipatia ai le atoaga ole 54 tausaga ole Tutoatasi o Samoa, peitai, na toe fetuunai le aso, ona ole faamoemoe e fia auai mai le Faatamā ole Malisi Aukilani mai Samoa, le afioga ia Lemalu Ray Ah Liki, faapea nisi o sui ole kalapu sa malaga atu i Samoa mole Sisigafu‘a.

Ose finagalo faaalia ole afioga ia Toleafoa Kelly Toleafoa ole Malisi Aukilani na ia ta‘ua ai, ole manulauti ole taamiloaga lenei, ina ia anau mai tupulaga talavou e taaalo ile tagapolo, ole toatele lava o tupulaga i nei aso, e pei ole lakapi lava oloo ave iai le faamuamua, ole toaele foi o mātua e unai lava fanau e taaalo lakapi.

Afioga Tai Galumalemana i le tauaaoina o le siaki tupe a le G - Mana e lagolago ai le taamilosaga
Afioga Tai Galumalemana i le tauaaoina o le siaki tupe a le G – Mana e lagolago ai le taamilosaga

Na saunoa Toleafoa o tatou Samoa e iai le manatu foi lea ole tapolo ose taaloga mole au maumea o nisi e manatu ose taaloga mo toeaiina ma tagata ua matutua. Peitai, ole taaloga lenei e mo tagata uma.

Afai ete taalo lakapi gau mai ai lou vae, e mafai lava ona e liliu mai ile taaloga tapolo ete taalo ai. Ole manulauti lea ale Malisi Aukilani ina ia avea le taamilosaga tapolo lenei e faalauiloa atu ai le taaloga i alo ma fanau, ae faapea foi soo se tagata oloo fia maua le faamalositino ina ia avea le tapolo ma taaloga e fiafia iai.

I tapenaga mo le faamoemoe ua iai le fuafuaga e faia le cocktail ile kalapu tapolo ale Aviation Country Club ile po ole Aso Faraile nei, 24 o Iuni ile itula e 7pm. O le po foi lea ole a faagata ai male resitalaina o suafa mo i latou e fia tausinio.

O lea ua tatala le avanoa ile taimi nei mole resitalaina o suafa. E na ole 72 avanoa oloo iai mo i latou e fia tausinio, ona ole utiuti ole avanoa ole a lē taliaina se suafa e toe faauluina ile aso ole taamilosaga. E leai foi se avanoa faapitoa mo se isi, ole tagata lava e muamua mai ole tagata foi lena ole a ave iai le avanoa.

  E tolu vaega a alii male vaega mo tamaitai ua vaevaeina iai le taamilosaga, e iai foi faailoga ua saunia mo i latou ole a faamanuiaina lo latou taumafai. Ole itula e 10am e tatau ona taunuu uma atu ai i latou ole a tausinio ile malae, ae ole itula 11, e amata ai le taamilosaga.

Na ta‘ua foi ele afioga ia Toleafoa, ole a auai ile taamilosaga le afioga ile Hai Komesina o Samoa le afioga ia Leasi Tommy Scanlan, ole afioga ile Konesula ia Faolotoi Reupena Pogi, faapea le Faatamā ole Malisi Aukilani le afioga ia Lemalu Ray Ah Liki mai, ae oloo tatala le avanoa mo soo se tasi e fia auai. E mafai ona resitala lou suafa ile Aviation Country Club, Telefoni  09-2754601.