Ua faaamauina nei i talafaasolopito o le Iunivesite aoao a Samoa le toavalu o fomai muamua (Medical Doctors) ua faauu mai le aoga faafomai a le Iunivesite a le atunuu, le National University of Samoa School of Medicine. O le faauuga a le Iunivesite i le faaiuga o le vaiaso ua mavae na faauu ai ma fomai e toavalu o alo ma tamafanau uma a Samoa.
Oi latou nei e aofia ai: Raymond Poe Eison Laulu, Sopolemalama Fuifui Maasina Leao Tuitama, Tricia Feliuai Neemia, Faasa‘o Junior Posini, Kamara Aniva Pouono, Esjae Sealiitu Sesega, Valerie Malili Sinei ma Tomasi Andrew Tofa.
O le vaega muamua lenei o fomai ua maua faailoga o le Bachelor of Medicine and Surgery mo suesuega o vailaau faafomai ma suesuega i le faia o taotoga.
O le faamoemoe o le Malo i le faatuina o se aoga faafomai i le Iunivesite a le atunuu, ina ia togafitia uma i Samoa gasegase e faaaogā ai faiga faaonapo nei i fesootaiga televavave.
O le NUS School of Medicine o se tasi o aoga faafomai e lua ua faatūina i Samoa. O le isi aoga faafomai o le OUM lea o loo faatūina lava i le nofoaga o le maota gasegase i Motootua.
I le sauniga o le faauuga o nei fomai fou, na ta‘ua i le lauga autu o le aso, le Afioga i le Alii Palemia, sa mamao lava ma se fuafuaga a le Malo e mafai ona toe faatu se isi aoga faafomai ona o le taugata o le faatupeina. Peitai i le mavae ai o le 32 tausaga talu mai ona faavaeina le Iunivesite Aoao a Samoa poo le NUS, ae o lenei ua tulai mai lenei moemitiga i lona mataina e pei ona ua faauu mai ai nei fanau i ni faailoga maualuluga mo tomai faafomai.
O le luitau la a le afioga i le Palemia ua tuu atu i nei fomai fou, ia lē na ona maua o faailoga faafomai, ae ia saga‘i ane loa e faatino o latou tomai ua iai, i se tulaga silisili ona lelei auā le tautuaina o gasegase uma i Samoa.
Na faaleo le agaga fiafia o nisi o fanau ua faauuina nei, ma sa latou tautino e lei faigofie le feagai ai ma suesuega ae sa taumafai lava i le mea e gata ai le mafai ma le lelei e gata ai aemaise le faalagolago i le fesoasoani mai lugā ua mafai ai ona tino mai nei faamoemoega sa na o ni moemitiga i le taimi ua tea, ae o lenei ua faaatoa mai e le Atua o latou moomooga.
Sa faaleo foi o latou lagona faafetai i le tapuaiga ma le lagolagosua malosi a o latou mātua ma aiga, nuu ma ekalesia, aemaise le faafetai i le malo mo nei avanoa ua faigofie ai ona matou maua ni aoaoga mo nei tomai tāua ae ua faatino lava i totonu o lo latou atunuu.
O le sini o nisi o nei fomai fou e pei ona faaleo i ni faatalanoaga ma nusipepa, e lē fia nofo ai i le mea e tasi, ae ia iai nisi mea tetele e mafai ona latou taulamua ai, e pei o le mafai ona latou togafitia lava i i Samoa le tele o gasegase o le mamalu o le atunuu nai lo le tau toe avatu i atunuu i fafo.
O loifofoga o le fiafia ma lagona mitamita o mātua ma aiga na vaaia i lea aso, a o faaula ma faafeiloai atu i fanau ua avea nei o ni fomai i totonu o le atunuu.
