O i latou le toalima muamua ua auai atu ma faauu mai lenei polokalame a le PARS’ (People At Risk Solutions) o le Toe Feso‘ota‘i Mentoring Programme, e pei ona faia i le Aso Lulu, aso 17 o Tesema, ua latou maua ai se amataga lelei mai lenei polokalame tāua ma fesoasoani tele i le toe fuataiina o latou olaga o ē ua toe saoloto mai saisaitiaga sa iai i le toese, ae ua mafai nei ona toe fuatai tomai mo le mauaina o se galuega, aemaise le mafai ai e i latou nei ua toe saoloto mai le toese ona fesootai atu i o latou aiga, ma toe fatufatu le soifuaga masani na soifua a‘e ai i tub ma aga na masani ai.
O lenei polokalame, le “Toe Fesootai” e tolu masina na faagasolo ai, ma e toalima nisi ua magalo mai falepuipui na auai atu i nei aoaoga, e faatasi ona fai i le vaiaso mo le 2 itula i le vasega. O se polokalame o loo galulue soosoo tau‘au ai i latou mai talaaga eseese o le Pasefika, ma e faatonutonu e le Amen International Networx.
Saunoa Amelia Nuualiitia, o le Pule Sili (CEO) o le Amen International Networx, o le “Toe Feso’ota’i o lona uiga i le faa-Samoa o le toe sosoo. Lona uiga ua toe maua ai e i latou nei se avanoa e talanoa ma fefaasoaa‘i ni mea e patino ia i latou e faatatau i o latou soifuaga, ae o loo faia faapena i totonu o se nofoaga o loo latou saogalemu ai. E faatāua tele ma faaaloalogia i lea nofoaga ma lea siomaga tulaga o tagata taitoatasi, ma e faifaimea faatasi e peiseai o se aiga.
Mai le toalima o i latou na amata mai ai ona faatino lenei polokalame, na mafai e i latou uma lava na e toalima ona faamae‘a lelei nei aoaoga, ma o se tasi o i latou na o lea ua maua sana galuega e galue tumau ai.
O se mea tāua tele lea, auā o se tasi lava lenei o luitau tele mo i latou sa nofosala i falepuipui ae oo ina toe magalo mai, e lē faigofie ona toe talia i ni fale faigaluega ma toe maua ai ni galuega. Ua matuā aogā tele la lenei polokalame mo le faatoilaloina o lena luitau pe a maua ausiaga mai lenei polokalame.
O loo faatulaga i luga nei i Aukilani lenei polokalame, ma o loo taumafai malosi ina ia toe mafai e i latou sa pagota ona fesootai atu ma talia lelei i totonu o le soifuaga masani o tagata, ma ia mafai ona soifua lava latou e aunoa ma le toe tau ola faalagolago i isi. Aemaise lava o lenei polokalame ua sili ona taulau ia i latou na e itiiti lava se avanoa e latou te toe solia ai le tulafono.
O lenei polokalame ua faatupeina atoa e le SkyCity Community Trust, ma e toatele lava foi i tagata Pasefika o loo galulue tauofo ai i le fesoasoani atu i ē na nofosala, auā o loo sili ona taulai polokalame fesoasoani i pagota Pasefika, ina ia toe fesootai lelei ma o latou tagata, ia latou tu ma aganuu, o latou aiga, auā e telē ai se fesoasoani i le faaitiitia o le solia o le tulafono.
I le aso na faauu ai i latou nei e toalima, sa maua le avanoa e fai ai ni a latou tautinoga e tusa ai o le aogā o lenei polokalame i ni suiga ua faia i o latou olaga, ma ua avea o se fesoasoani tele ia i latou e toe fotuai ai ma faia se amataga fou i o latou olaga.
Ma ua nofo sauni ai foi i latou e faasoa atu lenei saolotoga moni, i isi foi uso ma tuafafine o loo iai i nei olaga saisaitia, pe a oo ina saoloto mai ma toe fesoasoani i ai lenei polokalame o le “Toe Fesootai”.
