“Toatele ua avea ma auauna a le Atua ae lē ola ai”…Palemia
Ua tele Kolisi Faafaifeau i Samoa ma o le molimau i ai e toetoe lava tofu le ituaiga o ekalesia kerisiano i lo tatou atunuu ma le kolisi faafaifeau.
O tausaga ua mavae sa na o kolisi faafaifeau lava i Malua, Piula, ma Moamoa, ae o le sefulu tausaga ua tuanai e oo mai i le taimi nei ua molimauina le faatupulaia pea o fuafuaga lelei a ekalesia e faatu lava a latou kolisi faafaifeau faapea kolisi mo le aoaoina o mataupu faale-Tusi Paia poo Bible College, e avanoa ai le lautele o le atunuu o ē o loo fia sailiili i le Tusi Paia ma le Mataupu silisili ona aoaoina ma suesue ai.
O le Kolisi Faafaifeau a le ekalesia o le Apia Harvest Center lea o loo i Taufusi lata mai i Togafuafua lea o loo i tafatafa ane o le Oloa siiatoa a le kamupani o Amau na faatuina i le tausaga e 2011.
O se kolisi mo aoaoga o mataupu tau i le Tusi Paia ua lē gata o le itupa o alii ae o tamaitai ua maua ai le avanoa. O le tausaga ua mavae 2012 na amatalia ai le kolisi a le ekalesia Harvest Center e avea ma sui o le Kolisi faa-Tusi Paia o le Ia Malamalama Agape Bible College i Niu Sila.
O le tausaga nei le uluai faauuga talu ona faatuina ma e le gata o alii ua maua tusipasi ma faailoga tikeri ae faapea foi i le ituvai o tina ma tamaitai ua faauuina. O le vasega faauu muamua sa molimauina e le tusitala nisi o loo umia pisinisi ma galuega lelei i le Malo sa faauuina ai.
O le afioga i le Palemia susuga Tuilaepa L Sailele Malielegaoi, na saunoa i le saunoaga autū lea na ia le ‘alo i le ata niu i le tautino i le gagana tuusa‘o le tāua o le maua o le poto aoaoina i le mataupu silisili ma suesuega loloto i le Tusi Paia. Peitai na ia faaalia ua toatele tagata ua avea ma auauna a le Atua ae o le faafitauli ua ia matauina e lē o savavali ai.
Masalo e pine faamau lea vaega o le finagalo o le taitai o le Malo i le tele o faaletonu ua aliali mai ua aafia ai le aufaigaluega totofi a le Atua ma ē o loo umia faailoga ma taitaia ekalesia eseese.
E iai foi le talitonuga o se pine faamau lea o le soifuaga nei o loo tatou ola ma soifua ai, i lo tatou vaaia o i latou ua ta‘ua o auauna faauuina a le Atua ae o amioga ma o latou uiga faaalia e lē o ogatasi ma le tulaga aoaoina ua oo i ai i le talaiina o le Tala lelei.
O le sui faavae ma o le pelesetene foi o le Kolisi Faa Tusi Paia o le Agape Bible College i Hawaii le susuga i le faifeau o Dr Ieti Mageo mai Hawaii i Amerika sa saunia le lauga o le saunigalotu o le faauuga.
Sa ia tomatauina ai le aufaauu i ni fautuaga faakerisiano mo le tapenaina o lo latou olaga tala‘i. O le tasi o apoapoaiga a le susuga i le faafeagaiga na ia faaalia ai, e le’o le faailoga ma le tusipasi e faaleaga ai i isi ekalesia, ae o le tusipasi ma le faailoga e fai ai le finagalo o le Alii. “O outou o aila saunia a le Atua”, na saunoa ai le susuga i le faifeau.
E toaono i latou ua maua le Tusipasi o le Certificate of Biblical Studies, e pei o le faletua o Seiuli Titi Grey, Danielle Li‘o, Shorley Mariner, Eric Poe, Barbara Taulapapa, Falefasa Vaevaina.
E toa luasefulutasi ua maua le tikeri o le Associate of Theology Degree e aofia ai, Mike Betham, Lote Eli, Norman Faafetai, Susana Faumui, Fata Fiaui, Viane Gaga Filisi, Matafeo George Latu, Doris Lee Hang, Sieni Lesa, Saveatama Sinapati Li‘o, Mauupu Lova, Luamanuvae Taylor Mariner, Tutaitaga Mariner, Sara Pouoa, Faamatuainu Amosa Pouoa, Agnes Sam Chong Ripley, Annjeanette Sanele, Wellington Seufale, Ario K Tiatia Solofuti, Mautanoa Mapusaga Tanuvasa, ma Esera Toia.
