O le Aso Toonai na tuanai atu aso 18 o Oketopa na faatumulia ai le Town Hall a le pitonuu o Saint Kilda i le aai o Melepone, i uo aiga ma ekalesia o le au faau’u. E toa 64 ua faamanuiaina lo latou tautiga na faaoloolomaau mai ai. Sa tau saesae le uto ma tau saili le tofa mai le Atua ina ia tau lau o le sailiga o le poto ma utupupuina ai o latou finagalo mo le valaauina. O le susuga i le faafeagaiga mai le aai o Sini le susuga ia Ps Leaega Fialelei na fai ma fofoga o le faamoemoe.
O le susuga ia Ps Apouani Unasa na saunia le tatalo amata, o le susuga i le peresitene aoao o le kolisi le susuga ia Rev Dr Peniamina Williams na saunoa faafeiloai i le mamalu o le valaaulia ma Samoa na potopoto, sosoo ai ma le upu faauuina ale Atua na tomatau ai soifua o le au faau’u na saunia e le susuga i le taitai aoao o le kolisi le susuga ia Rev Dr Ieti Mageo mai Hawaii. Saunoa faalaeiau se tasi o malo faaaloalogia mai Amerika le susuga i le faafeagaiga ia Rev Sam Sweg, ma faagasolo ai loa le tolaulauina o le au fau’u e le aao tusitusi o le kolisi le faletua ia Folole Li’o mo le tauaaoina o o latou tusi pasi.
Na valaau faaaloalo lea i le susuga ia Onesemo Pulepule le taitai aoao o le AOG Samoa i Ausetalia na faapaiaina ma faamanuia ile au faau’u. Na sosoo lea ma le lagiina o le pese o le talaaga o le kolisi talu ona faavaeina i Melepone na saunia e le au faau’u, ma sasaa ai loa valevale alofa o aiga e ala i ulalole ma le luluaao o le faafetai, le ofoofo alofa i le fusi ma le sogi ma loimata o le faaeaina faatasi ma puegaata.
Na feagai laumua e tolu o le kolisi ma faafiafiaga a’o taumamafa le mamalu o le aufaigaluega paia ma tali le sua a le valaaulia ma Samoa, ona alo lea o le kolisi mamalu i a latou faaaloaloga mo le aufaigaluega totofi pei ona tu tootoo ai le tofa ia Afuie Alefosio. Na tasi le faatau a Tumua ma Pule i le fetalaiga ia Man`o e molimoli le agaga faafetai, ma taape ai le fuamanusina ma le viiga o le Atua ua maualuga ma le agaga o le faamanu. Ia e puipui i lou faauuga mai le Atua aua o oe o le Naseri i le Atua. Manuia le au faau’u.
faafeagaiga ma tamalii na faauu” width=”600″ height=”352″ class=”alignnone size-full wp-image-185232″ />
