Uluai Faamasino Tamaitai i le Faamasinoga Maualuga

Ua siitia maualuga pea le amanaia o le ituvai o tamaitai Samoa i totonu o tautua a le Malo ma soo se faalapotopotoga e oo lava i galuega tau faamasinoga.

Ua pine lea tulaga i le toatele o tamaitai ua faauluulu i ai galuega aemaise tamaitai o le atunuu ua ausia lava ei latou le faatinoga o ni pisinisi ma isi atinae mo le manuia o aiga, nuu, ekalesia ma le atunuu.

O lea ua faamauina i tala faamaumau o le faamasinoga a Samoa le filifilia o se tamaitai muamua e seei i le tofi Faamasino o le Faamasinoga Maualuga le Supreme Court.

O Mata Keli Tuatagaloa e sefulufitu tausaga o avea ma loia ma filifilia ai o le tamaitai muamua e avea ma Faamasino o le Faamasinoga faaitumalo le District court a le atunuu.

I le silia i le fā tausaga o galue i lea faamasinoga, ua toe avea foi ma tamaitai muamua e filifilia e avea ma Faamasino o le Faamasinoga maualuga.

O se matatia ua faafiafiaina ai tamaitai o le atunuu aemaise i latou o loo galulue faaloia ma sui uma o le sosaiete a loia i Samoa ona ua faaeaina se tasi o tausala o le atunuu i lea tulaga maualuga i galuega tau faamasinoga.

O le tele o tausaga ua mavae e pei ona silafia sa na o le vasega o alii sa tauaveina tofi faamasino i le Faamasinoga Maualuga, ae ina ua iai se isi suiga i galuega a le faamasinoga ina ua aumai faamasino mai fafo e galulue faavaitaimi i le tagofia o mataupu a le faamasinoga, na molimauina ai le agai ma o faamasino tamaitai mai fafo e seei i le Faamasinoga Maualuga e pei o se tasi o alo tamaitai o le atunuu na soifua a‘e i Niu Sila le afioga Ida Malosi.

Ua mae‘a lona taimi galue ma toe taliu i Niu Sila ae na sosoo ma se isi faamasino tamaitai mai Niu Sila lea o loo galue nei i le Faamasinoga Maualuga le afioga Justice Aitken.

Peita’i o le taimi muamua lenei ua tofia ai lava se tamaitai i Samoa ua iai agavaa ma tomai aoaoina i le tulafono ma umia le tulaga loia e avea ma faamasino o lea faamasinoga.

O le faafetai lea a le afioga Mata Tuatagaloa ina ua mae‘a ona faatauto i luma o lana afioga i le Ao Mamalu o le Malo, Tui Atua Tupua Tamasese Efi, a o molimauina e aiga, o uo ma faamasino o le faamasinoga.

Na saunoa le tamaitai faamasino ma ia momoli le faafetai i le faaeaea, ma na ia ta‘ua o le a ia tautua ma le faamaoni e aunoa ma le faaituau, faailoga tagata, poo le faia o le galuega ma le ita poo le alofa.

Na malele lana afioga i le Ao Mamalu o le Malo ma ave foi lana faamalo i le Faamasino Sili ona o le galuega fita e lē faigofie, aemaise o le faatuatuaga ua tofia ai se tamaitai muamua e galue o se faamasino i le Faamasinoga Maualuga a le atunuu.

O loo iai le faamoemoe e faia se tauaofiaga faapitoa a le faamasinoga poo se special sitting e faafeiloai ai le tamaitai muamua ua avea ma faamasino tumau o le Faamasinoga Maualuga a Samoa.

 Le afioga i le tamaitai Faamasino Mata Keli Tuatagaloa, afioga i le Ao o le Malo ma lana Masiofo ma le Faamasino Sili ma lona faletua Le taimi ua faatauto ai i luma o lana Afioga i le Ao Mamalu o le Malo, le afioga Mata Tuatagaloa ua avea ma tamaitai faamasino muamua i le Faamasinoga Maualuga a Samoa