O au o mātua fanau. O soo se taimi e mafatia ai se tasi o le fanau, e lagona e mātua le faanoanoa ma le tiga ona o le alofa, ma e leai se matua e fia vaai atu i sona alo, o mafatia ma faanoanoa.
Talu mai le faagasologa o le tautua a le South Seas Pictures i Samoa faapea le Samoa Video Centre i Aukilani i le tuu faatasia o ata tifaga ma le tele o faafiafiaga eseese ua maimoa i ai le toatele o lo tatou atunuu, o le taimi muamua lenei ua tuufaatasia ai se ata faapitoa, ua patino lava i le fesoasoani i alo ma fanau o loo aafia i le faafitauli ua faaperetaniaina, o le ‘Bully’.
Pe a faa-Samoaina, e tele lava ona uiga eseese, ma o aafiaga e talitonu o loo tupu i le taimi nei i le toatele o nai o tatou alo ma fanau, aemaise pe afai e te lē o silafia, e iai le ulagia o lou alo e le isi tamaititi pe a lapoa, lafo upu e aafia ai ona lagona, fasi ma taulamalama i lou alo, lau i upu e pei o le auleaga se‘i tulou, faamā i soo se ituaiga gaioiga ma faamatalaga mamafa, ma le tele o faiga sauā ina ia faatiga, tagi, ma faamaualaloina ai lagona o lau tama poo o tatou alo ma fanau.
O Niu Sila, o loo lona lua nei i atunuu o le lalolagi i se suesuega na faia, i le toatele o tamaiti aoga ma le lautele o loo aafia i le faafitauli lenei, ma o loo lona lua foi i le toatele o talavou i le va o le 15 – 24 tausaga ua pule i o latou soifua, ona o lenei lava faafitauli.
Peitai, e lē na o Niu Sila o loo aafia fanau i lenei faafitauli, o loo matuai pagatia ai le tele o atunuu o le lalolagi o loo faamautu ai o tatou tagata e iai Ausetalia, Amerika, Amerika Samoa, aemaise lo tatou tofi i Samoa, lea o loo lipotia mai i le tele o aso le maumau o soifua o nisi e oo lava i tagata matutua, ona o le faatauemu e nisi aemaise totonu o aiga, e mafua ai le mafatia o le loto, tino ma le mafaufau.
O le mea mautinoa, o le mafuaaga lea o loo faaletonu ai le tele o tulaga aoaoina o le toatele o fanau, e amata mai lava i fanauiti, e oo lava i fanau ua aoaoina i totonu o Iunivesite. Peitai, o le tulaga e sili ona faanoanoa ai, e toatele mātua e lē o malamalama lelei i le ogaoga o nei aafiaga, ma e tele ona faatuatuanai le lē ano tele i ai ma faataataaaluga i o latou mafaufau, ae o loo matuia ma ogaoga i le loto o le tamaititi. I nisi o suesuega o loo ta‘ua ai, e sili atu le mafatia o upu ma tala lafo i se tagata, nai lo le faaoo i ai o le fasi, o lona uiga, e lē laitiiti lenei faafitauli.
O le ata lenei ‘Sinalei’ e tasi le itula le umi ua tuufaatasia ai i se DVD mo le maimoa ma e pei ona ta‘ua, o loo faia faapitoa ina ia siitia ai lagona o nai fanau o loo mafatia i lea faafitauli, ma fesoasoani mo i latou aemaise i mātua ma ē o loo gafa ma fanau i aso uma.
O lona uiga, o se ata e tatau ona maimoa e o tatou aiga uma. E ui e na o le tasi le itula le umi o lenei ata, peitai, e lei puupuu se taimi na tuufaatasia ma pueina ai ona e lei faigofie, auā o se taimi muamua lenei ua faatinoina ai e le fanauiti se vaega tele o se ata tifaga a le kamupani e pei ona ta‘ua, i mea moni o loo tutupu i taimi o aoga ma le tuua o le aoga, aemaise uiga faaalia i totonu o aiga. O vaega o loo avatu ai, e matuai maligi ai lava loimata auā o le a avea o se fagufagu mo mātua uma, aemaise pe afai o aafia si au tama i lenei faafitauli, ae e te lē o silafia.
Ua momoli atu i lenei ata le olaga o Sinalei ma le la mafutaga ma lona tina, i le faafitauli na tupu, o uiga o le tina na faaali i lana tama ina ua sau i le aoga ma ta‘u i ai o loo fasi o ia e nisi tamaiti, o uiga faaalia o Sinalei, o ona mafatiaga, o le vaega a le faiaoga, ma tamaiti faatupu vevesi ma nisi o vaega.
O se tasi o masani a nisi o mātua, a sau le tamaititi e tagi mai i le aoga ma ta‘u i lona tina sa fasi ia e se isi tamaititi, e masani ona ita le tina ma lē fiafia, ma tuua‘i lana tama i le palaai ma le mata valea se‘i tulou, ae o nisi e faaoso lana tama e alu e fusu ma nisi o tulaga.
O se lesona mo i tatou uma lenei ata. Aua ne‘i misi se kopi mo oe ma lou aiga. ‘SINALEI’
E amata faatau i tua i le Aso Gafua, 25 Me 2015.
