E moni lava e lelei le Alii. O le alalaga fiafia lea a nai tagata Samoa i le Paranesi a Karawatha 2 i le Stake a Logan i le Aso Sa aso 15 o Fepuari talu mai le tausaga e 2007.
Ua matuai lagona le faagaeetia o i latou uma auā foi ua lē toe vaaia ni isi tagata papae ae ua na o Samoa lava.
Ua tali le Atua e ala i le nofo tatalo ai o nisi o nai o tatou tagata i le Ekalesia o le Au Paia o Aso e Gata Ai ona ua mafai ona faaaogāina le tatou lava gagana i viiga o le Atua, lesona ma vasega i tapuaiga i le Atua i Aso Sa taitasi.
Ua pei o se aso fou ia i latou uma lenei Aso Sa aemaise ua toe fefaasoaai lava i le gagana e faamemelo i ai Samoa.
E momoli ai lava le agaga faagaeetia ma le faafetai ia i latou uma sa gapatia i le tau toe faafoi maia o le gagana Samoa i totonu o tapuaiga lea ua tino mai ai ma ‘ae‘ae ai i nei manuia.
Ua faaaogā lava le faa-Samoa i vasega a tagata matutua se‘i vaganā ai lava vasega a fanau laiti ma le autalavou e faaaogāina lava le gagana peretania. E lata i le toluselau le aofai atoa o le Paranesi 2 a Karawatha i le Stake a Logan.
O loo tālia pea Paranesi Samoa i le isi Stake o (EMP) Eight Miles Plains masalo e lē o toe mamao o loo faasoasoa mai lava le agalelei o le Tamā oi le Lagi.
O le Aso Sa lava lea sa amata faaaogāina ai foi tofi ua mae‘a ona filifilia o le Peresetene le susuga ia Porotesano ma le faletua ia Timu Uta‘i, Fesoasoani muamua le susuga ia Ekeroma ma le faletua ia Tauvaga Fiso , faapea le susuga ia Alema ma le faletua ia Holly Masame, ma nisi lava o tofi o le Paranesi 2.
