Ole suafa Aupito ile afioaga o Matatufu ose suafa ole aiga oloo tauavaeina ele tamā matua ia Aupito Lolesio Pupu lea ua savali nei ile 78 tausaga le matua o lona soifua. Peitai ua ia filifili ma lagona ua alagatatau ona ui lana ula pe tuu atu le suafa ole aiga oloo ia tauaveina, i lona alo ulumatua le afioga ile alii Faipule, le Tofa Su‘a William Sio na te faaauau le tauaveina ole Suafa.
O Su‘a William Sio oloo avea nei ma faipule ole itumalo o Magele ile Palemene a Niu Sila. Ole ui ole ula ase Matai Sa‘o matua i sona atalii e lē ose mea e tupu soo, ae ole faaui ole ula e iloa ai le alofa moni ole tamā i lona atalii, ma le mafai ona ia faailoa atu ile itumalo ma le nuu lona manaoga a‘o soifua mai.
Sa faailoa foi le lagona o lenei tamā, i lona faia ai o lenei filifiliga tonu mo lona atalii, ua tatau lea ma onomea mo ia, auā ole ala lava ile pule ole tautua. Ua tele ni galuega lelei ua oo iai le sao o lona atalii, le afioga ile Faipule mo lona aiga, ua lē gata i Niu Sila nei ae ua oo lava i Samoa.
Ole aso 28 o Oketopa na faataunuu ai loa le manaoga ole tamā i lona atalii, e ala lea ile uiina o lana ula poo le faaee atu iai ole suafa ole aiga Aupito nate tauaveina. Ose faamoemoe sa fau ao fau po, ae ana lē seanoa le alofa ma le agalelei ole Atua e lē mafai ona faataunuuina ma le manuia.
O aiga na malaga atu i Niu Sila ma Ausetalia faapea aiga i Samoa na molimauina lenei nofo ile maota i Faletapu i Letaupe i Matatufu, ole maota e afio ai le afioga ia Aupito, le afioga ile Sa‘o Usoalii ma lona Usoalii.
Ole maota foi e afio ai le afioga ia Soloau, ole augafaapae ma le Sa‘onalua. E afifio ai foi le afioga ile alo ole Sa‘o ole afioga ia Siaoloanailetai. Ua paia ai foi Mataava, ole maota e afio ai le alii o aiga le afioga ia Tuia, e afio ai foi le afioga ia Tapu ole Matua, ma le Paia ole Lautinalaulelei. Ua Paia ai foi Maota ma Matavai o Maota e afifio ai Fiaola ma Ili ole paia o Alaalamaota.
Na usu faaaloalo le mamalu ile Aliimau o Faleupolu, le Ituala ma Saleapaga. Sa aliitaeao foi le itumalo auā Fiame ma Aiga Salevalasi, Le susuga ia Sitagata ma le aiga Sa Sitagata ole vaa taumualasi i faigamalo.
Sa usu faaaloalo foi i laua Aliimau o Faleupolu ma le Matuatia ole Faleatua, aemaise ai ole usu faaaloalo ale Usoga a Tumua ma Pule ma Samoa na aofaga potopoto ai.
Ole susuga ile fesoasoani ale Ekalesia Katoliko na ia faapaiaina lenei faamoemoe faatasi ai ma le lagolagosua a nisi o susuga i faafeagaiga i totonu o lenei afioaga.
Ae ole faafetai ma le faamalo ale taitai ole sauniga na ia saunoa ai e faapea ile taimi ole faapaiaina o le nofo, ole silasila ale Atua ile totofiina o Tavita e lei vaai lava le Atua ile tino ae na silasila lava ile loto ole tagata e tutusa o laua loto ma le Atua.
E faapena foi le vaai a lenei tamā i lenei tofiga, ua ia vaai ma filifili ile atalii e tutusa o laua loto ile taitaiina ole aiga ma e toa foi e leai se palaai, ae faalagolago ile Atua i mea uma e manuia ai le aiga ma le nuu.
