Ua toe faia’ina foi le Blues ae manumalo le Crusaders

E tolu taaloga faitauina o le vaiaso ua tai. O le feiloaiga a “H” e lua, le Highlanders ma le Hurricanes i Dunedin i le aso Faraile ma le taaloga a le Crusaders ma le Chiefs i Hamilton. Faatasi ai ma le taaloga a le Blue ma le Rebels.

Highlanders vs Hurricanes

O soo se ‘au lava mattia ma malosi, e iai ma lona itu e vaivai ai. Ae o le malosi’aga o le Hurricanes, o le saoasaoa lea o lana laina i tua, o lea foi na avea ma mailei ia te ia ina ua ta’u e le Highlanders le sese o le ‘au i le saoasaoa o ana sikoa na maua.

Ae leai se isi e faitio, aua e lē o le laina i tua a le Hurricanes na faaletonu, ae o lana laina i luma i le foueti. Na vave malepe le lineout a le Hurricanes ma solomuli ai i tua i le taaloga atoa.

E fa sikoa i le lua na manumalo ai le Highlanders, ae o le saoasaoa o le taaloga na faate’ia ai le Hurricanes. E 149 pasiga ma osofaiga e tele na taitaia e Aaron Smith. E ui foi na tuli i tua Liam Squire, na tulilimaina Julian Savea ae na to’a le Highlanders i le taimi na malolo ai Squire, aua na toe maua ai le sikoa a Highlanders auala ia Tevita Li. O isi sikoa a le ‘au na maua e Waisake Naholo, Jeff Toomaga-Allen ma Lomax. O le faiaina ua faaletonu ai le avanoa e ofi ai le Hurricanes i taaloga faaiu o le Super Rugby.

Crusaders 34 vs Chiefs 20

E pei o se masini e le mafai ona taofia le savaliga a le Crusaders i totonu o le Super Rugby. Na talimalo le Chiefs i le taaloga lea i lona malae i Hamilton, ae e pei lava o tuafale o Christchurch lea na fai ai le taaloga, faatusa lea i le masani o le ‘au e faatonutonu lona lava vaifale.

Mo le Chiefs na tu malosi Damian McKenzie ma Charlie Ngatai. Ae na alu loa i tua Brodie Retallick ina ua manu’a, o iina na faamalosia ai le finau a le Crusaders. Na amata i le lineout na sao loa le sikoa muamua a le Crusaders mai le lineout na uma ai foi ma le taaloga. E malo le Crusader ae e le’i taitai uma le taimi, o le mattia lea o le Crusaders.

Crusaders o avanoa e maua e le Chiefs na avea ma tulaga na faaletonu ai le Chief ma maua ai le tele o sala na aa uma e Richie Mo’unga.

Blues 10 Rebels 20

A ma’i lava le ‘au e ma’i lava. E faapena le Auckland Blues, ua toe faia’ina foi i lona lava malae i le taaloga ma le Rebels a Melepone. E lei fesoasoani i le taaloga le misia o Rieko Ioane ma Sonny Bill Williams mai le Blues ona ua faatasi atu i le tolauapiga a le All Blacks, ae na foliga mai o se ‘au faatauvaa i le taaloga ma le Rebels. Ua leai le maai o osofaiga e masani ona tauave e Ioane ma SBW, ua faaopoopo lea i faaletonu masani a le ‘au, faatasi ai a le manu’a o Dalton Papalii na atili ai ona faaletonu le taalo a le ‘au.

E tele avanoa na fausia e le Blues e sikoa ai. Ae na tele foi mea sese na fai aemaise ai i totonu o le 22 a le Rebels. E iai le sikoa na tatau ona faitauina, na maua lea mai le malosi o le sikalamu, peitai e lei manino le tataoina o le polo ma le faaaogāina ai e le laufali le sikoa.

O le a malolo le Super Rugby mo le tolu vaiaso mo taaloga faavaomalo. E toe foi le taamilosaga i le aso 29 o Iuni mo le isi fa vaiaso. Ae e foliga mai o le a tauva le Highlanders ma le Hurricanes mo avanoa e to’alua ai ma le Crusaders mo taaloga faaiu o le SR.

Faaiuga o taaloga o le vaiaso ua tea

Highlanders 30 Hurricanes 14

Blues 10 Rebels 20

Chiefs 20 Crusaders 34

Reds 41 Warratahs 52

Brumbies 41 Sunwolves 31

Taaloga e sosoo ai, aso 29 Iuni.