Ua mafai nei e le afioga Tauiliili Petelo Li‘a ona tuufaatasia uma i se lipine e tasi ana pese, mo le faatau atu i le mamalu o le atunuu. O le album ‘Tauiliili Petelo Lia – mo oe’ ua tuufaatasia uma i ai ana pese ma le talitonuga o le a toatele i latou e fiafia i ai, auā sa faapea foi ona toatele le mamalu o le atunuu sa fiafia i ana lipine o pese tasi (singles) mai lenei album lea sa tatalaina i le amataga o le tausaga nei.
O le faanaunauga o le susuga Petelo, ina ia mafai ona faalautele atu e lenei lipine tuufaatasi ni feau matagofie o loo iai i nei pese i la tatou lava gagana Samoa.
E 13 pese o loo iai e aofia ai ma singles ua uma ona tatalaina, lona uiga e 8 pese e lei faafofogaina muamua.
A o faagasolo le galuega o le faaliliuina o nisi o pese, na ta‘ua e le alii fatu pese, sa ia maitauina, o loo iai ni upu e iai lona talitonuga ailoga e iai se tamatane e na te lē fia faaleoina atu nei upu i se tamaitai, ae ailoga foi e iai se tamaitai e na te lē fia lagonaina mai le faaleo atu o nei upu mo ia!
E tele taimi sa galulue faatasi ai Petelo ma le susuga ia Eddie Tuala ina ia faamautinoa e oo atu lenei galuega i lona tulaga maualuga e pei ona ua tulai mai ai.
Mai lava i le faavaa o le album e oo atu i le nota o le pese mulimuli, e telē se faaeteetega na ave i ai ina ia mafai ona faamalieina lē o le a ia avea lenei lipine e fai mana meatotino.
E momoli pea le agaga faafetai o Petelo i le susuga Eddie Tuala mo itula uumi na ia faataulagaina auā lenei taumafaiga.
Ae sili foi lana faafetai tele e mo i latou uma o loo faaalia pea le lagolago e le gata i upu ma feau faamalosi, aemaise lava i le faatauina o ana lipine pese.
Saunoa Petelo, o le taimi lelei lava lenei e faatau ai se kopi o lana lipine manū o loo faatau atu i le na o le $20 tala i le lipine, auā o lenei tau e mo na o se taimi faatapulaa.
E pei lava foi o lipine tasi muamua, e lē faatauina atu nei lipine i ni faleoloa. Ae mafai ona maua se kopi pe a valaau i ai i le telefoni (09) 266 2063 pe text i le 02102270424 poo le imeli HYPERLINK “mailto:liafamily95@gmail.com” liafamily95@gmail.com.
E faatapulaa le aofai o kopi o le a maua, ma e kiliva fua i nisi vaega o Aukilani. O le Aso Toonai o le a faatau atu ai i le taulaga faatau i Otara.
