“Ua mae‘a le tusigaigoa ale afioaga o Faala Palauli”
E masani lava le tamalii i lana tu ma lana savali e oo lava ile faasafua o lona alofa foai ua lē faatuaoia. Na molimauina ele mafutaga a Faala i Palauli ile latou posiva, le faamaoni ole Atua auā, ose mea lava ina a lelei o uso ae nonofo fealofani.
Ole leo ole alaga fiafia, o upu masani lava o aso faapenei, “Ua malie le faga i pa‘au, ua malie le papa ole faatolotologātama, ua inumalie le faleselau, ua papa foi tumua’i aua o ai na iluilu talutalu e maua lenei seleni maoa’e ma le tele?”.
E lei taumate faalou le magā le faatuatua ole afioga ile Peresetene ia Laulu Site Ah See ma le mafutaga a Faala aua ele i manofonofo ile faalauiloa atili o lenei faamoemoe. Na malaga mai le susuga ia Rev Uilipifosi Teo e tapena le faamoemoe ona toe taliu lea i Samoa ao lumanai le aso taupoina. Na vaaia le toatele o alo ma tama fanau ua le gata i le alalafaga o Faala, ae tainane foi pitonuu o Vailoa ma Vaitoomuli sa opogi ma lagolagoina le po siva.
O le masina o Mati ole tausaga nei na faato’a faavae ai le mafutaga a Faala i totonu o Brisbane ona ose tusi faatalau’ula mai Samoa ile faafeagaiga EFKS Rev Uilipifosi Teo, na tagisia ai e Laulu ose vaa ua goto ise seleni aua le maota ole galuega.
E le o ni tagata e omai ise ekalesia e tasi poo se aiga e tasi o loo faavae ai lenei mafutaga e pei ole tele o mafutaga. E lei faapito manū ia tasi pe fesiligia poo lea a le ekalesia peitai na susu’e lava le faamalama ole Isaraelu moni ma tepa ane aua e mamae lava le tava’e i ona fulu, e pele lava le nuu ole tagata ia ma mitamita iai.
Na muai sii mea i Matautu Sa e ala i le taulaga molia na taitaia e se tasi o lupe faalele ale alalafaga, le susuga ia Rev Perelini Tauilo ose faafeagaiga ale ekalesia EFKS. Na faagasolo polokalame ole aso, ma, o le sui ole faigamalaga mai Samoa, Lagaaia Tapuni sa faafeiloaia le valaaulia aemaise le susū atu ole aufaigaluega paia ale Atua aemaise o Samoa na potopoto.
Ole tofa ia Tui Alatina Vaimoso ole sui taitaifono sa fai ma fofoga ole aso, oi laua foi male faletua ia Rachael sa tuu mai o la tau‘au ile tapenaina ole fofoga taumafaga. Ua tino mai le faamoemoe e ala ile limalima faatasi, galulue faatasi, male felagolagomai ae faasili ai na viia le Atua ise seleni ua tauaaoina e tusa male $68,271.00.
Ole alofa foai o aiga, uo ma ē masani faapea paolo ma gafa, tainane le Matagaluega EFKS a Saute ma nisi faafeagaiga male loaloa mai isi ekalesia, na faaalia lo latou valevale alofa ile posiva a Faala sa faia ile Tiafau Hall (EFKS Southwest BRISBANE) ile Aso Toonai na tea nei. Na matuai maofa ma aleluia faafetai le mafutaga aemaise le aumalaga mai Samoa ile faatumulia ole faamoemoe aemaise le solo atu ole alofa tulai. Ole tofa lava ia Lagaaia Tapuni na taualugaina le aso, sa tu tootoo auā faaaloaloga ua masani ai aso faapenei. Na fai ma sui ole aofia na potopoto aemaise le nofo a faafeagaiga, le tofa ia Ofoia Lemamea, o ia ole nofoa tasi ale matagaluega EFKS a Saute, ole Tiakono Toeaina, e lauga faafetai auā faaaloaloga maualuluga na maau iai le afioaga aemaise ole fofoga taumafa sa saunia.
Na faaiuina ile tatalo na saunia ele susuga ile Toeaina Faatonu ia Rev Tauaaga Mataafa ma ta‘ape ai le filialii, fiafia tagata uma auā na tofu a le gogo ma si ana i‘a.
