O Samoa o le aiga, soo se tautua ma soo se valaauina e mamalu ma maopoopo pe a lelei ma fealofani aiga, ae o la a le tusi, “A iai Iesu i se aiga o se aiga fiafia”.
Na o le tolu aso na malaga asiasi ai le afioga i le Gafatasi ia Fuimaono Aloalii Alex e asia nai tauaiga ma uo i Melepone, maua le feiloaiga ma silafia ai o loo sauni Fuimaono e ofi atu i le faalagamaea mo upufai o lo tatou malo i le tausaga fou. Na lei toe manofonofo ona aiga ma uo ae amata tapena loa se fiafia ma valaaulia uma ai aiga ma ana aumea mamae aemaise o le mamalu i le itumalo o alala ma papaaao i le aai, ina ia fiafia faatasi ma faamanuia atu ai i le alo o lo latou aiga, a o se atalii, se uso ma se tuagane, e tusa ma lana moemitiga o le fia avea lea ma tofi o lona itumalo o Falealili i Sasae i le faiga palota tele a le atunuu i le tausaga fou.
O le afiafi o le Aso Faraile na aofia potopoto ai ma faataunuu le faamoemoe, se mea ina a lelei ma matagofie o aiga ae fusia i le fealofani ma le feoeoeai.
Na taunuu le malaga i le afiafi o le Aso Lulu ma amata tapena ai le faamoemoe, ae na uigaese le faatumulia ma le mamalu o le Silisiliese na maitauina i lea po, i tupu, tamalii ma tapaau o lo latou aiga, a o nisi foi o tupu ma ee o le itumalo, uo ma aiga na pati ma po ma saasaa faa-Samoa. Na tali le sua ma fiafia faatasi, tainane saunoaga faalaeiau ma tatalo faamanuia a lupe faalele o le talalelei a le aiga, afioaga ma le itumalo, e a‘e manuia faiva e tapuaia, e a‘e manumalo faalagamaea e patipatia e le Aufaigaluega totofi ma le aufai tofa.
Na saunoa Fuimaono Alex, ma momoli lona agaga faagaeetia ma le maofa ona o le lotonuu ma le silasila alofa a lona itumalo, ona aiga ma uo, e tusa ma faamanuiaga aemaise o le faamalosiau i lona loto.
O ou māmā na, o loo muamua Keriso na te faalauleleiina ou ala uma.
