Ua mae‘a le faitau masina, a ua faitau vaiaso nei le faamoemoe o le alo o le atunuu, David Tua, vaeane le suafa Toailetai.
O se faamoemoe o loo tulimatai uma e le lalolagi, ona ua iai nei lea tamalii o Samoa, i sona tulaga maualuga e le faatusaina i le taimi muamua sa oo ai foi lona taumafai i le tumutumuga o lea foi faagatama, e ui ina lei manuia. Peitai e ui lava i le tulaga sa tulai mai i lena foi tausaga, ae le o suia ai lava le miti a le alii fusu, o lona manao lea e pale i le Fusi o le Lalolagi.
O le toe agai atu o le susuga ia David Tua, ma toe aea le apefai mo lea lava faamoemoe, ua toe tatai ma ua tosina nei i ai mafaufau o le toatele o tagata e fiafia i lea foi taaloga, aemaise soo se tasi lava e lagolago i le alo o le atunuu.
O le mae‘a o le fusuaga ma le alii tautaua o Niu Sila, o Shane Cameron sa maimoaina i itu e fa o le lalolagi, sa maitauina ai le tulaga ese o le malosi ma le toe foi mai o le mafaufau o le alii fusu mo le faatinoina o le taaloga. E le gata i lea, ina ua mae‘a le fusuga lava lea ma Cameron, ae toe sosoo ai ma le faalauiloaina o isi fusuaga e tolu o le a faia i le amataga o le tausaga nei.
O nisi ia o mafuaga ua toe lagalaga ai manatu ma toe faaosofia le fia maimoa o tagata lautele i taualumaga o le faamoemoe o David Tua.
O le aso 31 o le masina nei o le a faataunuuina ai le taaloga a David Tua, ma le alii o. O se tasi o taaloga e fai lava foi si ona tāua tele mo le alo o le atunuu, mo lona toe taumafai e aea le isi sitepu mo le faataunuuina o le miti ua leva ona naunau i ai.
O le Aso Tofi o le vaiaso na tea nei, sa auai atu ai le sui o le Samoa Times, i tapenaga ma sauniuniga a Tavita sa faia lava i lona fale koleni i Onehunga. E lua itula sa faataunuuina ai, ma e toalua nisi o alii tautaua mai Amerika sa faafetauia ma taalo ma Tua.
O le alii o Harold Seromiers mai Florida, o ia foi o se alii fusu faapolofesa mai le tausaga e 1996, ma ua fai ma ana galuega le faafetauia o alii fusu aemaise lava taimi e sauni ai mo taaloga faitaulia. O le isi alii o Israel Garcia mai New York o le tasi lea o alii o loo feagai foi ma lea lava ituaiga galuega.
O ia foi o se tasi o tama taalo o le a muamua i le taaloga a Tavita i le aso lava lea 31 o Mati. Ua savalia nei le lua masina talu ona iai i Niu Sila ia alii mo le fesoasoani e faafetauia David Tua, i taimi o ana toleniga.
O lea lava foi aso sa fesiligia ai e le Samoa Times, i latou uma o loo nafa ma vaaia le itu tau i koleniga, aemaise o tapenaga a Tavita mo le faamoemoe o loo loma nei. O nisi nei o a latou saunoaga ma talitonuga e uiga i le tulaga ua oo i ai le malosi o le alii fusu o Tua, a o sauni atu mo le taaloga tele.
Roger Bloodworth (Trainer)
O le talanoaga ma Roger sa faia i le gagana Peretania, peitai o lona faaliliuina lenei i le gagana Samoa.
O Tua ua iai lona faamoemoe mo le fusi o le lalolagi i soo se taimi lava, amata atu lava i le taimi nei. E telē le esesese ua oo i ai le malosi o le alii fusu, pe a fua atu i isi ana taaloga talu ai. E matua ese lava foi le malosi lea ua iai Tua, ese mai lona malosi sa iai i le taimi sa tapena ai le fusuaga ma Shane Cameron. Ou te lagona ua matua lava tapena Tua mo lana taaloga i le faaiuga o le masina nei, aemaise ai foi e pei ona ou taua, soo se taimi lava e fusu ai mo le siamupini.
O lau galuega o le taumafai ina ia faatumauina le malosi o Tua, vaai i tulaga uma e puipuia ai mai soo se auala o osofaiga a ituaiga fusu esesese. Saunia o Tua i ni metotia fou ma ni faiga fou e saga faatumauaina ai lona malosi. Taumafai ina ia taulai (focus) lona mafaufau i taimi uma, ina ia mafai ona tuu i ai lana vaai, mafaufau atoa ai ma le malosi (physically and mentally), o vaega tāua tele ia. Ia paleni lana minoi mai taimi uma e gaioi ai agai i luma, ma le toe solomuli ese mai lana paga, ina ia tutusa ma talafeagai sitepu ma gaioioga o le tino, ae faatonutonu e le mafaufau.
E tāua tele le saunia o le tino ina ia malosi, ae sili foi ona tāua le saunia lelei o lona mafaufau ina mautinoa e o gatusa ma lona faataunuuina, o le manumalo lena. O le taimi nei ua lava sauni Tua i lona malosi i le tino, ma le mafaufau, ae le faapea o le a taofia ai lau galuega e fai lava seiloga lava ua uma le fiafia o Tua i le taaloga.
O le alii faatonutonu o Roger lea e pei ona faatalanoaina, ua savali nei i le 70 tausaga lona matua, peitai o loo tumau lava lona malosi mo le tapenaina o le alo o le atunuu.
O ia foi e toatele ni tagata fusu o le lalolagi, sa ia faigaluega ai mo le faatonutonuina i auala ma metotia e manumalo ai, e pei o le tasi o alii tautaua o Evander Holyfield ma isi.
Alex Su‘a
O se tasi o tamalii o le atunuu sa iloga foi lona tulai mai i le taaloga o faipelega i lona foi taimi, ma o loo avea nei foi o se tasi e faufautua malosi ma fesoasoani foi e ala i le faaaogaina foi o lona tomai ma lona silafia, mo lona uso o David Tua, tulou le gagana ua faaaogaina. O lana mau ina ua fesiligia foi i sona silafia i tapenaga a Tua ua iai nei mo lona faamoemoe. ‘Ioe ou te talitonu lava ua sili atu le vave lea ua iai nei le uso ia Tua.
Ua iai foi o ia i le tulaga maualuga i vaega uma o lana tapenapenaga pe a toe faatusatusa atu i isi ana taaloga ua mavae. O se tulaga lelei lea, aua e le tatau ona tumau ai i se mea e tasi, ae ao lava ona agai pea i luma, ma saili auala pea, aua le mālōlō.
Manatua foi e tele gaioiga e faia i totonu o le maea, ona o le lava o sauniuniga ma tapenaga sa faia i le taimi o toleniga, a ea? Ae ui lava i se vaai i ai mo le taimi nei, ae o lo‘u talitonuga o loo a‘e pea le tatou tama i le apefai.
O lona a‘ea pea o le apefai agai i le faamoemoe, o le agaga fiafia tele lea, auā e avea lea ma auala e fiafia ai pea Tavita e tulituliloa lana miti, aemaise o se tatou foi manaoga o loo iai i le taimi nei, o le siamupini.’
Harold Scomiers & Israel Garcia (Spa Men)
‘O se avanoa maualuga tele ua maua e malaga mai ai, e faafetauia le malosi o Tua. Ua leva foi ona iai i totonu o le taaloga, aemaise ai o le faaaogaina o le ma malosi mo galuega faapea, aemaise lava pe sauni mo ni taaloga faitaulia. O Tua o se tagata fusu malosi tele, pe a fuafua foi i isi tama fusu sa ma auai mo taimi faapea.
O le amataga o Fepuari na ma taunuu mai ai mo le faamoemoe o Tavita, ma o le taimi nei i le ma‘ua vaai, ma lagona foi i le taimi e taalo mai ai Tua, ta te faalogo atu lava ua vaivai i le malolosi o tui ma le felelei mai o kolosi a Tua.
E tau lagona lava le palaai i taimi uma e fai ai toleniga, ae o se lesona aoga tele foi mo ma‘ua, ae mo Tua foi, aua e manaomia lava e Tua nisi e pei o ma‘ua, e fesoasoani tele mo ituaiga auala e agai i ai ana osofaiga i le taimi o ana taaloga.
O Tua o se tama fusu malosi tele ma silisili, manaia foi lo ma iai i Niu Sila nei.’
O le masina o Aperila e toe taliu ai nei alii e toalua i o la aiga ma le atunuu sa malaga mai ai. O Harold Scomiers, e mai Florida, a o Israel Garcia e mai New York i Amerika lava.
Toailetai David Tua
Samoa Times: O a mai oe, a o ā mai lau faalogo mo lenei taimi?
David Tua: Manuia lava uso faafetai. Ia o loo solosolo lelei lava, ua tele foi sina suiga ua oo i ai le malosi latou ia, ae o loo fiafia lava foi e faaauau pea le toleni ia. Manaia lava foi le tulaga ua oo i ai tapenapenaga latou ia, faafetai lava foi i le toeaina (Roger) ona o le tuu mai o lona silafia e faaopoopoina ai pea foi se iloa mo le faamoemoe.
Faafetai foi i nai uso sa malaga mai fafo, o loo faia a matou toleniga, auā e tāua tele lo la sao mo au, e tāua le taalo i tagata faapea, e fua agai i ai sauniuniga ona e eseese lava auala e faatino ai le taaloga, ia o aoaoga lava mea uma. Ua sauni lava, ae faamoemoe lava i le Atua, e aumai ai le malosi ma le mafaufau tonu e faia ai le taaloga. Faafetai lava foi i le atunuu, mo le tatalo mai ma le tapuaiga e manuia ai le taumafai. Faafetai foi mo le faatasi mai, ae tuu i le Atua lo tatou faamoemoe.
