O se alii Samoa e nofo i Magele i Aukilani i Saute, ae faigaluega i le vaega a le Healthcare i le kamupani a le Fisher & Paykel i East Tamaki, o le a faafeagai nei ma se suesuega faapitoa, ona o lona kopi faagaoiina ma toe faatau atu ata o le Tautoga Gausia.

O lea alii sa toe suia lana faamatalaga ina ua ia iloaina ua amata suesuega e faasaga ia te ia, ma ua iai foi nisi ua molimauina, le kopi faagaoi o ata ma toe faatau atu i nisi latou te faigaluega faatasi ma isi o ana uo.

E tusa ai ma faamatalaga a se molimau faamaoni ma le maumaututu, sa ia faailoaina i le Samoa Times e faapea, sa talanoa lelei ma lea tamā, ma sa ia tautino ane foi o ia sa faia lea tulaga o le kopi o ata ma toe faatauina i le na o le $5 i le ata e tasi.

E tusa ai ma le faamatalaga a Lupe i le la talanoaga ma le tamā, sa ia ta‘ua ai e faapea, o le po o le Aso Lua aso – sa vili ai i le kamupani e faigaluega ai Lepopoi, ma talosaga i ai e na te fia maua lava se kopi o le ata o le Tautoga Gausia.

Sa faailoa i ai e fia matamata i le ata, ae paga lea e na te lē gafatia le totogi o le ata o loo faatauina ai. Sa fesili le tamā poo ai na ia iloa ai e fai ana kopi o lea ata.

Sa tali i ai Lupe, o nisi lava o ana uo e faigaluega faatasi i le Fisher & Paykel, sa molimauina ona sa faatau a latou ata DVD mai ia te oe.

Sa vave ona toe faapea ane le tali a le tamā, e malie o ia ua na lē o toe faia lea tulaga ona ua fefe ua ta‘u ia e le tagata. Ua ia faalogo foi i le tala o lea ua suesueina lea mataupu ma ua fefe ina ne‘i maua o ia. Sa ia toe faapea ane foi, ua leai ma se mea faigaluega o toe iai i lona fale, ua mae‘a ona tapena ese ana masini ma na te lē toe faia lava.

Sa fesiligia e Lupe, pe faapefea ona fai, ae sa tali Lepopoi, e iai lava le polokalame faapitoa i lana masini computer e faigofie tele ona fai ai le galuega. Sa toe fesili Lupe, pe lei faaaogāina masini a le kamupani o loo faigaluega ai e fai ai lana pisinisi. Ae na tali ane Lepopoi e leai, leaga a maua e tuli ai ma ia, ae na o lona fale lava e fai ai.

O nisi foi latou te faigaluega faatasi, sa fai ane sa oo atu le isi tamaitai i le kamupani, ma saili lona tagata ma fesiligia foi le mataupu lava lea i ata o loo kopi faagaoi. O le ala lea ua manatu ai e sili loa ona tuu a o lei maua o ia. O le faamatalaga atoa lea a le alii o Lepopoi.

Sa toe fesili Lupe i le tamā, pe ua fia ni kopi ua mae‘a ona ia faia ma faatau. Sa tali ane e tusa ma le 17, ae o le isi tina masalo ua toe faatau i ai e se isi lana ata i le $10, ma ua lē fiafia ai auā e $5 tala lava e faatau ai ana ata.

O le tina la lea ua ia ta‘uina i le pule o le kamupani e ona le ata, lea na amata ai loa ona suesueina ma ua fefe tele ai.

E lē gata i lea, ae sa ia toe faailoa foi ia Lupe, sa ia maua foi faamaoniga ua mae‘a ona faasalalauina i le nusipepa, le sailia o le tagata o loo faia faananā kopi o ata ma faatauina, ma o ia faamatalaga uma ua ia talitonuina ma faamaonia, o ia tonu lava lea o loo ua sailia nei.

Sa toe fesili i ai Lupe, pe leai lava sana ata se tasi o iai i le fale ma ia, ona e na te lē mafaia lava le $30 o loo faatauina ai le Tautoga Gausia? Sa faapea ane le alii o Lepopoi, e leai ona ua mae‘a ona tapena ese ana masini, ma ua leai ma se ata o totoe, e oo foi ia te ia lava ia ua leai foi sana ata o iai.

Sa toe taumafai pea Lupe ma toe faapea atu i ai, na faalogo e iai lau tama Filipaina lena lua te faigaluega faatasi e na te faia foi lea tulaga. E lē maua mai ai sau ata i lau tama lena. Se ou te iloaina lava e iai se pomu a lau tama lena o loo nanā.

Tali ane Lepopoi, e lē o se Filipaina, o le tama Initia, a ua lē toe faigaluega iinei, ua alu ese ma le kamupani. Ua leva foi ona fai e le Initia lea pisinisi o le kopi ma toe faatau atu.

O ata Filipaina lea e fiafia lava i ai nai tina Samoa, sa fai e lana tama Initia kopi.

Sa toe faapea ane foi Lepopoi, o ia foi sa tele lava i ata Filipaina sa ia faia kopi, peitai ua lē toe faia foi.

Sa toe faatauanau pea Lupe, ma ia toe faapea atu, se malie pe lē maua lava se kopi se tasi mo ia, ona ua fai si leva sa taumafai atu ai, ae lei maua lava lana susuga. O lea la ua tapuni lana pisinisi, ae faato‘ā maua ai foi ma se fesootaiga, toe talosaga tasi i ai Lupe.

Sa tali ane loa Lepopoi, ua lelei ae vili ane i le telefoni lea o le fale, e na o le 256 na matala ane, ae toe faapea ane Lepopoi, o i leai avatu le telefoni feaveai leaga e alu e ave lana fanau aoga i le aso e sosoo ai, o le Aso Lulu lea. O le telefoni sa tau ane o le 027 —-, text mai lau telefoni taeao ma se nofoaga ta te fetaui ai e avatu ai lau ata, ae aua ne‘i iloa e se isi faamolemole.

Sa toe fesili ane Lepopoi ia Lupe poo fea e nofo ai, sa tali Lupe o Otara, e ā, e mafai lava ona ou alu atu i lou fale e piki mai. Ta‘u mai lou tuatusi, peitai sa manao lava Lepopoi e fetaui i se isi nofoaga e ese mai lona fale i Magele.

O le aso na sosoo ai, ua fiu Lupe e vili le telefoni sa tuu ane, e lei maua lava, o le po lava lea sa toe taumafai ai Lupe i le falefaigaluega o le alii o Lepopoi, ae peitai sa tali ane le tali telefoni o le 574 0123 ext 8243, e lē o faigaluega lana susuga.

O le tala a Lupe e foliga i lea afiafi ua mae‘a ona faaoo le talosaga a Lepopoi i le au talitelefoni, ina ia tali filemu ane i le tali faigofie, ona o le auala ma le leo sa tali ane ai lana valaau.

Sa toe taumafai foi Lupe i le po o le Aso Tofi o le vaiaso lava na tea nei, peitai ua tali ane le masini ma faapea ane e lē mafai ona maua se isi i le extension lava lea e tasi.

O le naunau ma le manao o Lupe e tulituliloa pea le la feagaiga ma le tonu sa fai ma Lepopoi, ma o le ala lea sa lē toe faatali ai mo se isi lava taimi, ae sa malaga sa‘o loa e saili le mea tonu e faigaluega ai lana uo.

O le Helathcare a le Fisher & Paykel e fai lava si tetele o fale, ma e lē tasi foi se fale, peitai o le lagolago ane o nisi o le mamalu o le atunuu e faigaluega ai i le kamupani, sa faigofie ona maua tonu ai le fale ma le pito e galue ai le tama kopi ata.

Na ta‘ua e Lupe e faapea, e taunuu i le vaega tonu e galue ai Lepopoi, faato‘ā ta le fa i le afiafi o le Aso Faraile lava lea, o le taimi tonu foi lea sa taumafai ai le tamaitai o le kesi i luma e faafesootai le alii fai ata. Peitai e ta ane lava le lima e lei oo ane lava, leai foi ma se isi faamatalaga, ona ua mānava foi ma le tamaitai faigaluega e faafeiloaia malo asiasi agai atu i totonu.

O se tasi o alii sinia o le kamupani sa agai ane i fafo ma tapa loa e Lupe mo se fesoasoani, ma sa vave ai ona feiloai ma le tama sa manaomia e ala i se talanoaga i le telefoni, ona e lei avanoa ane lava i fafo Lepopoi.

Sa matuā faateia Lupe ina ua faapea atu si ana tala, sole ua fiu e vili lau telefoni, ae sa fai le tuugatala e feiloai i se nofoaga ma momoli ane ai lana ata le Tautoga Gausia. O le tali a le tama na faapea ane, O le ā le ata,? Sole ou te lei faia lava ni kopi o le ata lena, na o ata Filipaina lava.

Faapea lava a‘u ai o se ata foi lea o se faaipoipoga, auā na o le pau na o ata ou te faia. O ata a aiga lava latou ia, a o le tele o ata sa ou faia kopi, o ata Filipaina lea e fiafia lava i ai tina Samoa. O ata na e fai mai ai, sole e sala ai ta‘ua, ou te lei faia lava se kopi o le ata lena e te fai mai ai.

Sa ta‘ua e Lupe ua fiu e toe taumafai atu sona avanoa e tau faamalamalama ai ma toe faafoi le talanoaga agai i le po o le Aso Lua lea na fai ai le la tonu, peitai ua fafa le isi pepelo i luga o le isi pepelo. Saunoa Lupe, leaga lava le mea e leaga o le palaai ma le fefevale ina ua amata ona maua. Sa matuā lē iloga se mau tala ua sisio solo i ai le tama, ma lona leo e lagona lelei atu lava le tete ma le popole.

Sa toe faamanatu uma i ai e Lupe ana faamatalaga sa fai ane i le po muamua, ma ia faapea atu loa i ai, ua lava lea ua ia mautinoa ua toe sui atoa lana faamatalaga. E tasi le mea na toe faamanatu i ai e Lupe i si tamā, o le kopiina foi o ata Filipaina e solitulafono foi e pei ona ia toe tuuaia ma sisio i ai, ma ua lava lea e faamaonia ai, e moni o lana galuega sa fai e solitulafono, ma o le gaoi lava lea.

Sa toe lui e Lupe a o lei faamae‘aina le talanoaga, ma toe faapea atu i ai, “Lepopoi e te manao e toe replay atu le ta talanoaga lea sa faia i le po o le Aso Lua?” Ae sa faapea ane le fesili a Lepopoi. ‘O ai oe?’ Sa tali i ai Lupe, o le a e iloaina i se taimi, ae ta‘u atu ua matuai e pepelo tele ma le toe sui o au faamatalaga uma.

O le lē fiafia tele o Lupe, sa faaoo mai ai lana savali i le Samoa Times, ma lona naunautaiga talosia ia maua le tamā lea, ma o le a na tuuina foi telefoni uma e maua i ai Lepopoi i le tamaitai pule o le kamupani e ona meatotino, lea sa fai ai le pisinisi faagaoi a le alii o Lepopoi.

Sa fesiligia le tamaitai pule o le Video Centre ma le South Seas Picture, pe na fesootai atu le alii o Lupe e tusa ai ma lana faamatalaga. Sa faamaonia e le faletua ia Taufau Aokuso, e moni ua taunuu atu le faamatalaga atoa a Lupe, ma o le a tuuina loa i leoleo ona ua leva ona faatali mo le isi osofaiga ma e talitonu, ua lava lea molimau e faamaonia ai le mataupu i leoleo ma le tulafono.

Saunoa foi Taufau, e tele isi molimau o loo iai, ma sa ta‘ua ai lava le tamā e nofo i Magele, ae faigaluega i le Fisher & Paykel, ma e iai le talitonuga e tusa ma le molimau a Lupe, o le tagata tonu lava lea.

O loo fautuaina foi e Taufau le tamā lea, ina ia vave ona fesootai ane ia te ia, ma fai se talanoaga a o lei oo i ooooga o le tulafono le mataupu.