O le molimau lea mai le alii Minisita o Faatoaga ma Faigafaiva, e ui e lei iai se manaoga e soona faalauiloa lea galuega a le Malo. “E lē o tele lava se promotion i le galuega lenei leaga o lea e tau faataitai lava i le taimi lenei ma mātau lelei poo fea e agai i ai le ola a le araisa,” o se saunoaga lea a le alii Minisita ina ua fesiligia e le tatou ofisa pe moni o lea ua toto le araisa i Samoa.
“Ua fai si leva, o ni nai masina ua mae‘a atu na amata ai le polokalame lenei i le va o Samoa ma tagata mai Saina ia o loo taumafai e vaai pe ola le araisa i Samoa”.
Faaalia e le alii Minisita sa vaavaai poo le ā tonu lava le ituaiga araisa e talafeagai le toto i Samoa auā ua silafia foi o le araisa lea e tele ina faatau mai i atunuu mamao, ua toto i atunuu e pei o Saina ma isi atunuu o le atu Asia, e tele lava ina toto i toga araisa o loo faaaogā ai le vai ma o vaivai nei o loo ola ai le laau lea.
Peitai o Samoa na ta‘ua e le alii Minisita na vaavaai pe iai se ituaiga araisa e mafai ona toto sa‘o lava i le eleele.
O le araisa la lea ua totoina nei ma ua vaaia le ola tausiusi i le taimi lenei. Ae iai foi le faafitauli ua tulai mai, o le manu faalafua lea e ta‘ua o le Myna Bird, lea ua tele masina o taumafai le Matagaluega o Punaoa faalenatura ma le Siosiomaga e tafiesea, lea la ua agai foi i toga araisa ia ua totoina i Nuu.
“O le manu faalafua lea ua vaaia nei le ono tulai mai ai o se faaletonu i lenei atina‘e ma ua galulue foi i latou o loo faatautaia lenei faatoaga e saili auala e taofia ai le agai atu o lea manulele i le faatoaga i Nuu,” o se faaaliga lea a le alii Minisita.
O le Myna Bird, le manulele lea ua vaaia i soo se vaega o le atunuu, na aumai i Samoa ina ia tape ai manu ainiu – aemaise o manu ninii na osofaia manu papalagi.
O lea la ua alu ese isi manu faalafua na ia osofaia ae ua fiu le atunuu e toe tape, ua faatuputupulaia lava le Myna i Samoa. Ua iai foi taumafaiga ina ia faalauiloa i afioaga eseese o loo tele ai le manulele, auala e tape ai ma ia pue ai.
Ua iai foi ma faasalalauga e totogi ai tagata e maua nei manu ma avatu i le Matagaluega – ae e foliga mai e lē o faaitiitia lava le numera o lenei manu faalafua i totonu o le atunuu. O lea la ua avea ma faafitauli muamua lava o le atina‘e lenei o le araisa ma o le faamoemoe ina ia saili le auala e aveese sa‘o ai le manu lea ma faasao le atina‘e o le araisa.
E ioe le alii Minisita o le matuā tele o le fesoasoani ae ola lelei le araisa i Samoa, aemaise pe a vaavaai i le manaoga o le atunuu ua tele lava ina agai i le araisa, o se isi lea o taumafa poo mea aano i taumafataga o aso taitasi.
Ua matuā tele le ituaiga araisa ua faatau mai fafo ae o le tau e lē o faaitiitia. Ua iai taga araisa ua oo lava i le $70 i le $80 (tala) le tau, ma e lē o tuuitiitia ai le numera o le atunuu o loo faatauina lenei oloa.
O le toatele lava o le tupulaga laiti ua na o le araisa lava ua fiafia i ai ma o se manaoga tele le taga araisa i faatauga o vaiaso.
Atonu o se isi auala lea o le a mafai ai ona maua pea lea taumafa, lea e fai lava ma ta‘ua le lē lava i faleoloa. “O le taimi lenei ua na o ni faataitaiga ma o loo faaauau ona vaavaai ma e oo loa ina mautinoa le lelei o le ola o le araisa ma le leai o ni faaletonu, ona faato‘ā faalauiloa atili lea o lenei atina‘e,” o se saunoaga lea a le afioga i le Minisita.
