Ua pei ole lupe ua lele ma sola ua leiloa le ‘au ale atunuu, le Manu Samoa, ua leiloa poo fea o iai. Ua mavae atu taimi sa lagona ai pese malie ma upu logolelei sa vivii ai le Manu Samoa, ole saafi ale atunuu ua lē toe vaaia ua mou atu.
Sa manatu ole a toe lagi le pese ma faalagi viiga ole Manu Samoa, a‘o lumanai le taaloga ma Georgia ile vaiaso atu i tua, ae pagā lea, na lē talitonu le vaai ale toatele e pei oloo tuufesili poo le Manu Samoa moni lea sa taaalo ma Georgia.
Ole tala na aumai ole a toe fuatai le Manu Samoa ma vaaia lana taalo ua lauiloa ai pe a fetaui ma Fiti ile Aso Toonai na tea nei.
Sa o tatou maimoa uma ile televise, pe toe vaaia le Manu Samoa moni ale atunuu, ae pagā lea e foliga mai lava, elē ole Manu Samoa lea a Samoa na vaaia ile taaloga ma Fiti.
Talofa e ia Samoa, ua leiloa lana Manu e pele i loto ma finagalo. E ui i lea, ole a fai pea le tapuaiga ale atunuu mo lana ‘au i lana taaloga mulimuli oloo totoe ma Toga ile faaiuga ole vaiaso nei.
I le taaloga ma Fiti, na gata le malosi ale Manu Samoa ile 34 minute ole taaloga. Ole taimi foi lea na gata ai sikoa a Samoa ile sefulu male ono. O lona uiga, e lei sikoa Samoa i minute e 50 ole taaloga mai le minute 34 seia ili le faaili ale laufali ma uma ai le taaloga. Na amata lelei le taaloga ale Manu i lana tamoe malosi ma uiga ua tatou masani ai ile tatou Manu Samoa.
E ui ina amata sikoa Fiti ile sala na ova ile lua minute ole taaloga ile kiki a Sereamaia Baikeinuku, peitai na tali Samoa ile minute 5 ole taaloga ile sala na a‘a e Tusiata Pisi. Samoa 3-Fiti 3. Toe maua ma isi sala e lua, a‘a foi e Pisi ma ova ai ma alu ai loa i luga ‘ai ole Manu Samoa 9-3 Fiti.
Na alu ai pea ma le malosi le Manu ile vaaia ole tamomoe malosi ole ‘au. Ile 33 minute ole taaloga na maua ai e Motu Matuu le polo ma agai atu ai ile laina sikoa. Na ova le a‘a a Tusiata Pisi ma oo atu ai ‘ai o Samoa 16-3 Fiti.
Ae ole taimi foi lea ua amata ona palasi uaga ma susū ai le malae. E pei na avea ia timuga māmā ua ala mai ai Fiti mai lona moega ma amata ai loa ona malosi mai lana taalo, ae uma ai foi iina male malosi ole Manu Samoa. Na vaaia ai foi le tele o mea sese ale Manu Samoa. Ose vaaiga lenei ile taaloga mai le 37 minute ole taaloga.
37 minute: Manu Samoa 16-3 Fiti. Kiki mai le 22m ae poloka e Fiti, ana le pasi le polo e sikoa Fiti.
38 minute: Sikalamu ale Manu Samoa ua toe liliu ele laufali i luma ole laina a Fiti, ona ole mea sese ale Manu.
38 minute: Misi le tele o pue a Samoa ma sikoa ai le numera 2 a Fiti na ova le kiki. Manu Samoa 16-10 Fiti.
41 minute: ‘Afa lona lua – Kiki e Fiti le polo e amata ai le ‘afa lona lua, faasala Samoa 30 mita mai le laina a Fiti. Kiki le sala, ova. Samoa 16-13 Fiti.
43 minute: Solomuli le sikalamu a Samoa ile laina 22 a Fiti, maua a e Fiti le polo osofa’i ma aga’i atu ai i le afa a Samoa na alu i tua le polo. Lineout a Samoa.
43 minute: Togi i totonu le polo e le Manu, ae maua e Fiti le polo.
45 minute: Sikalamu, tulei e Fiti le sikalamu a Samoa e pei lava e leai se sikalamu a Samoa ile unai a Fiti. Ole mafuaaga, e lei tulei Faosiliva. Faasala Samoa, kiki e Seremaia le sala ma ova ai. Samoa 16-16 Fiti.
49 minute: Aofaiga o pue misi ale Manu e 14 ile 4 a Fiti.
62 minute: Faasala Samoa i luma o lana laina 22. Kiki e Seremaia le polo ma ova ai. Samoa 16-19 Fiti.
77 minute: Na maua e Samoa le polo na togi i totonu mai le lineout, ae mamulu le polo ile pue a Fiti. Na osofai Fiti ma sikoa ai Patrick Osborne. Maua ‘ai ole taaloga ina ua ova le kiki, Samoa 16-26 Fiti.
Ole faia‘ina ale Manu ia Fiti ua mamulu ai foi ma le Ipu ale Pasefika. Ua lua ai nei manumalo a Fiti ia Toga ma Samoa. A‘o loma le taaloga faaiu ile va o Tonga ma Samoa. E foliga mai ole a tele ona fesiligia ele atunuu metotia ale pulega oloo koleni ai le ‘au, pe aisea ua faapea ai le Manu Samoa.
E afua nei fesili ona ole tele ole fesoasoani ua tuuina atu ele Iuni Lakapi ale atunuu (SRU) mole ‘au. E toatele naua le pulega, ma tagata tomai lakapi eseese ua fautuaina Namulauulu Alama Ieremia le faiaoga ole ‘au. E toaiva le pulega ale ‘au.
E ese le Faiaoga Ulu, a‘o isi faiaoga e toatolu ole foueki, sikalamu male faiaoga ole malosi ma le mānava. E ui i lea, elē o alu ai i luma le lelei ole Manu Samoa. E foliga solomuli le atinae ole ‘au ae lē o agai i luma.
Ole ala lea ole tagiaue ole atunuu ona ole leiloa o lana Manu e pele ile loto.
O moomooga ia toe maua mai uiga masani ole Manu se‘i faafiafiaina ai le atunuu, auā ua leai mase pese fiafia o toe faalogoina e vivii ai le Manu Samoa.
