E lei atoa se vaiaso talu ona toe taliu atu i Niu Sila le faigamalaga tasi le vaiaso ale alii talavou o Nick Lolesi. O lea alo ole atunuu na fanau ma ola ai lava i Niu Sila ile 34 ai o tausaga muamua o lona olaga.
I lana faamatalaga, e iai lava le vaega o lona olaga oloo faatalatala ia te ia, ma unaia pea lona loto e ao ona faamalie. Ole sailia lea ole aiga o lona tamā, aemaise ole nuu na fanau ai.
Pau le silafia o lea alii, e iai ona aiga Samoa, ae e augapiu ma sona silafia ose faa-Samoa, se upu ole gagana poo se vaega ole aganuu. Talu ai ole 17 o ona tausaga na maliu ai lona tamā i Niu Sila. Ae maliu lona tamā, e lei mafai ona ia faamatala pe faailoa atu foi ia te ia ona aiga i Samoa. Sa foliga lava e leai se manaoga o lona tamā e toe foi pe toe agai mai latou i Samoa.
Peitai e faatalatala lava ia te ia, le iuleo oloo faapea mai, e iai lava le mea o lona olaga oloo misi. Ole malaga lenei mo ia, ole taimi muamua ua oo mai ai i Samoa, ma tuua lona tina ma lona aiga, e vaaia le latou faatoaga, poo le lafu manu e iai manupapalagi, ise vaega ogatotonu o Aukilani.
Ole faafetai a lea alii ona oloo iai lava tagata ole aiga o lona tamā, oloo totoe ai i Samoa ma malaga atu e faatali lona taunuu i Faleolo. Ole taimi muamua foi lea na feiloai atu ai lona aiga Savaii ia te ia.
E lei iai se naunauga ole alii e matamata ini mataaga ile vaiaso e tasi ua faaavanoa mai ai lana galuega e sue aiga o lona tamā. Ae o lona manaoga ia soo lava Samoa, ma sa faapena lava ona faia.
Na muamua lava faafeiloai ile ipu ‘ava i luga ole vaa Gaualofa. Lea na talanoa Nick, ole nofoaga lea na folau mai ai tagata e ‘ainā Samoa, lea ua amata ai lana sailiga. O luga ole vaa Gaualofa na ia iloa ai le laititi o Samoa, ina ua la fetaui ma se tasi o ona tausoga.
O luga ole vaa na fetaui atu ai ise tasi foi o alii talavou, e tutusa lo la matutua. Ole alii lea o Chris na taunuu i Samoa e fia iloa foi lona aiga Samoa ma le agaifanua ale tatou atunuu.
Ole paaga fou lea a Nick na maua ai lona to’a, auā ose tagata e tutusa a la misiona. Na faamatala Chris, o lona tamā ole Samoa ae o lona tina ole palagi, ma e faapena foi lana uo fou ua maua nei i luga ole Gaualofa, o Nick.
Ina ua maua le taavale rent e fetaui ma le manaoga o Nick, ma alu ai loa le tietiega taamilo ile motu o Upolu ma se vaega ole auvaa ole Gaualofa. Ole tasi lea vaega ole misiona ale Gaualofa, ole unaia lea ole gagana ma le agaifanua a Samoa, atoa ai ma le aumaia faatasi lea o fanau ale Pasefika.
Ole Aso Toonai talu ai na malaga ai Nick i Savaii, ole vaega lea o lana misiona ua manao lava ina ia tupu ma oo atu ai ile nuu na fanau ai lona tamā. Ua alu lea alii saili le pepa fanau o lona tamā, ma maua ane ai o Lolesi ole tama a Susana Wilson, ae na fanau i Lefagaoalii Samauga i Savaii.
Ole fesoasoani ma le faamalosiau ale auvaa ole Gaualofa, aemaise ole alii o Chris, na lototele ai lenei alii e faia lona sitiseni Samoa e ala i lona tamā.
E tasi lava le aso na talosagaina ai le faailo poo le stamp i lona tusifolau mai le Ofisa Malaga a Samoa ile eleele fou, ae maua ile 2pm ole Aso Lua ole lona tolu o aso talu ona taunuu i Samoa.
Ua toe faaopoopo ai le malosi ole faananauga ole alii o Nick e malaga atu i Savaii se’i saili le nuu na fanau ai lona tamā. Ole afioaga lea o Lefagaoalii e iai ona vai taele. O luga ane o Vai taele nei i Vaga oloo iai le tulaga maota ole aiga o lona tamā, o iina e talitonu tagata ole aiga oloo iai nei, o iina na ola ai Susana i lana tama o Soia le tamā o Nick.
O Susana ole tama a Taoa, le afafine o Too ma Pai, tusa ole lima ai o augatupulaga lea e maua mai ai Nick Lolesi. Ile faamatalaga a Ologa Manutulila Eni, ole nofoaga autu lava lea ole aiga o luga ane o vai taele i Vaga, oloo iai le tulaga laoa ole aiga.
Sa iai atufālega o faleoo o loomatutua e tupuga mai ai le aiga. Pei ona iai Taoa ma ona uso o Meafou ma Ologa ma le latou tuagane o Nuu. Ole fanau a Taoa e iai, Susana le tina o Soia ma le teine o Alisa, ole teine o Siaa ma le tama o Samuelu.
Na sau Nick e fia iloa lona aiga, ae uma ane ua toe ta’uta’u le isi malaga, sa faapea e tasi le masina, ae oo ane ile taimi na alu ai, ua fa masina lea e nofo ai i Samoa ile isi taimi e sau ai. Ua toe taliu atu i Niu Sila, lea alo o Samoa e faigaluega, ile faatoaga manupalagi a lona aiga, ma faaputu tupe e toe fai ai foi se isi ona sao ile tamaoaiga o lona atunuu.
