Ua maoluma folafolaga kapeteni o le Aeto

Ua maoluma folafolaga a le Kapeteni o le fautasi o le Aeto, o lona vaa e sola ma le manumalo o tuuga fautasi foe sipuni faavaomalo.

“O lo‘u igoa o Vaamua Henry o lona uiga o le vaa lena e mua i le tuuga”, o le tali lea a le kapeteni ina ua fesiligia i le mae‘a o le fono mulimuli a kapeteni a o lei faia tuuga fautasi. “Ou te faamālūlū atu i se tulaga ua oo i ai le taumafaiga, ae e leai se faaletonu o le auvaa”.
O le finagalo lea o le kapeteni na folasia i luma o le tapuaiga a le afioaga o Pago Pago na malaga mamao mai Tutuila i le fia tapuaia o le alofaiva o le Aeto.

E iai tuuaiga a le kapeteni faasaga i le fautasi o le La o Samoa mai Lepea, e faapea na faalavelave ane i le taimi na alu ai le tuuga. Peitai e lē o lagolagoina e se sui o le komiti o tuuga fautasi lea tuuaiga.

Fai mai le sui o le komiti ua lē manao e faailoa lona suafa, sa lelei le amataga o le tuuga. E leai foi se faalavelave o le La o Samoa i le Aeto, pau le tulaga na ia molimauina o le faaiuga a le kapeteni o le Aeto le susuga Vaamua Henry Sesepasara, e toe sui lona alavaa lea na sosoo ai ma le Segavao.

E toe sui le alavaa o le fautasi mai Tutuila ua fai si mamao i luma o le Segavao tusa ua ono fautasi.
O se faanoanoaga lea o le sui o le komiti i le tulaga ua folasia ai e le kapeteni o le Aeto se tuuaiga e aunoa ma se faamaoniga.

Ua maua foi e le komiti ni molimau e faapea sa manao le kapeteni e apili le faaiuga o le tuuga ona o le faasalavei o le La o Samoa. Peitai ua faafetaia e le komiti se finagalo o se tasi o matai o le nuu o Pago Pago na malaga mai le auvaa, ua na taofia ai lea tulaga ona sa lelei lava le tuuga i le molimau ma le silasila.

Ua maua foi ni faamatalaga e lei mafai ona faamaonia e faapea na iai se fuafuaga a le kapeteni e tuuina atu se ofo e selau afe tala Amerika i le kapeteni o le Segavao ae toe fai le la tuuga. Peitai na faailoa i ai e le kapeteni o Vaimasenuu Zita Martel, ua uma le tuuga aloaia o le Tutoatasi, e leai la se isi mafuaaga tatau o le a toe faia ai se isi tulaga faapea.

Fai mai se molimau faatuatuaina, e lei talia e le kapeteni le tulaga na oo i ai lona fautasi, o le mafuaaga lea o le sailiili auala faapea.

E lē o iloa pe o le a toe aumai se valaaulia o le Segavao i tuuga fautasi o le Fu‘a a Tutuila i le tausaga fou.
Ae ua maua ni faamatalaga salatua e faapea ua faamavae nei le kapeteni o le Segavao, ma ua ia tuu atu le galuega i se isi tautai na te faaauauina.

E $25,000 ua maua e le Segavao, ae $22,000 ua maua e le fautasi o le Fetuolemoana muamua na manumalo i tuuga fautasi e alo i foe laau.