(Elia Tuilo‘a Faimalo Tau)
Ua sautia le ‘au matatao ma taloto moemoe auā o aso o le ‘ata ma le tagi, o aso foi o le fiafia ma le faanoanoa. O taimi o faavauvauga e ufitia ai i le lē mautonu, peitai e suiga mālie le pogisa i le malamalama auā ua valoia “Amuia e faanoanoa, aua e faamafanafanaina i latou.”
O le ta tonu o le 12 i le vaveao o le Aso Tofi, aso 18 o Aperila, na logo ai aiga i se tala faamomoiloto, ina ua tuua le malo e le Susuga i le Taitai pese a le Ekalesia Evagelia Uesiliana Metotisi i Logan City, le susuga ia Elia Tuilo‘a Faimalo Tau mai le alalafaga o Safotu i le motu tele i Salafai.
O se gasegase oso faafuasei na motusia ai le mafutaga ma le faletua ia Faatoeina ma le nofoaalo aemaise o aiga pele. E tuua nei le malo ua 57 tausaga o lona soifua.
O le faatinoina o galuega a o taoto lona tinomaliu i le falefaasausau a le Toomata Funeral Services, le afioga ia Ta‘uo Siaki Valu Toomata.
Na matuai maofa le aofia i le mamalu ma le mataina o le sauniga sa alo i ai le falefaasausau a lea foi tamalii aemaise o se tau pa‘ū na agalelei ai le alii pule ma le aufaigaluega sa faamāmā avega i aiga faanoanoa.
E ui ina pisi le alii pule i nisi maliu i Sini peitai na malaga mai lava ona o le fia auauna i ona tagata i lenei foi Setete o Kuiniselani.
E lei faaulugofie i aai o finagalo o tauaiga o le susuga ia Elia Tuilo‘a Tau aemaise si ona faletua ia Faatoeina ma le nofoaalo le tala faavauvau auā faato‘ā valu vaiaso talu ona faamavae i se tasi foi o tamā o le aiga, le tofa ia Faimalo Faleiva Tau e pei ona motusia le mafutaga i le maliu ma le oti.
O le taitai o le sauniga faaleaiga i le Aso Faraile, aso 26 o Aperila sa feagai ma le failautusi o le faasinoti a le Ekalesia Evagelia Uesiliana Metotisi mai Melepone, le susuga ia Avau Faafuata, talosaga sa feagai ma Rev Faatui Leati (LMS Pasefika), a o le lauga faamafanafana sa saunoa i ai le susuga i le tausi matagaluega Ekalesia Faas+inoti Metotisi a Logan City le susuga ia Moloka Toleafoa.
O ona toe sauniga i le Aso Toonai sa taitai e le susuga i le Sea ia Rev Falemai Mika (Sea Ekalesia Evagelia Uesiliana Metotisi Logan City). O talosaga sa feagai ma le susuga ia Moloka Toleafoa, ae folafolaina le upu faalaeiau e le susuga i le Taitaifono Ekalesia LMS Pasefika, susuga ia Afoa Alapati Tuuga Stevenson.
Sa fai ma sui o aiga na lua le fetalaiga ia Faimalotoa Ioane Pale, o ia sa fai mo Fofoga o le aso, ae o le tootoo o Leulumoega le fetalaiga ia Telei‘ai Leituala, sa faaleoina se agaga faafetai e fai ma sui o le aufaigaluega a le Atua ma le auvalaaulia ona o le maualuluga o faaaloaloga.
O le tofa ia Poulava Sam ma le tausi ia Lorna Matautia na tapenaina le taumafataga matagofie felanulanuai na tali ai le sua ma laulelei ai tagata uma.
Tau ina ia faamaise le Agaga o le Atua i le faletua ia Faatoeina ma le nofoaalo faapea
aiga na lua.
