Ua malo le toa, ua faamalo le tau!

O ni ufi e tutupu lagona o le fiafia, o le foe ua faaee nei i le tao auā o lele ua faamanuiaina taumafaiga i le tele o tausaga sa tauivi ai faalea‘oa‘oga, lea ua tutaula ai nei le vaa o le faamoemoe, ua faaeaina le tautiga faalemafaufau ina ua faauuina nei mai nisi o faailoga faalea‘oa‘oga.

O le afioga ia Toafiaoalii Sarah Tyrell le isi tamaitai sa lotolotoi i le faasologa o le faauuga a le Iunivesite o Aukilani i le vaiaso na mavae atu nei, i lona faailoga faafaiaoga pasi i le Bachelor of Education in ECE.

O se mitamitaga sili lea i nai ona tuaa, le tamā o Semisi Lau Tyrell mai le alalafaga o Fasitootai ma le tina ia Alofaiupu Lau Tyrell mai le alalalafaga o Satapuala, aemaise le tapuaiga ma le lagolago malosi a nai ona aiga uma, sili foi le matafaioi tauave a le susuga i le Faafeagaiga ia Faiva ma lona faletua, faapea foi le tapuaiga a le Aulotu Saint Paul Samoan Methodist i Otara.

Na mae‘a le faamoemoe o le AUT i le Aotea Hall ona tuumuli mai lea i le hall a le Aulotu i Otara, na toe mafuta ai aiga ma uo, o le aulotu ma le susuga i le faafeagaiga ma lona faletua ma toe ave ai le viiga ma le faaneetaga i le Atua ina ua a‘e malo taumafaiga sa feagai ma le tamaitai o Sarah.

Sa faatumulia le hall ia i latou na auai atu e molimauina lenei foi faamoemoe tāua.

Na saunia lava e le susuga i le faafeagaiaga Rev. Faiva le faafetai ma le faapolo i le Atua mo lenei faamoemoe, ona faaiu foi lea i le taumafataga tele na saunia ma tapenaina lelei e nai ona tuaa ma aiga.

Ia Toafiaoalii Sarah, ua malo le toa, faamalo le tau! Alofaaga mai lau Ekalesia, Aiga ma Uo mo oe, ia manuia tele le lumanai ma ona faamoemoega uma.