A o faia malologa o le aoauli i le Aso Lua, aso 22 Fepuari, i le ta tonu o le 12.51pm, na faateia ai faipule o le Maota Fono a le Palemene a Niu Sila ina ua matou faalogoina le lulu o le maota ma eleele ona o se mafuie.
Sa iai le manatu, na o Ueligitone o loo aafia i lenei mafuie, peitai ane, na taunuu mai fesootaiga ma faamatalaga faanoanoa ua malepe le aai o Kalaiesetete ona o le mafuie lea sa matou lagonaina i Ueligitone.
Ua atoa nei le vaiaso talu ona lulu le mafuie. Ua malepe le taulaga atoa o Kalaiesetete e pei na pa ai se pomu ma ua nutililii le tele o fale ma nofoaga lautele. E lē o atoatoa le ola o le eletise i le tele o nofoaga.
O loo faaletonu le suavai taumafa. O lea ua oo i le 146 le fuainumera o i latou ua maliliu ona o lenei faalavelave.
E silia ma le 200 tagata e lē o mafai ona faamaonia poo soifua pe leai, ma o loo fauauau pea galuega laveai i nofoaga ua faatamaia.
E silia ma le 700 tagata na malaga faapitoa mai atunuu mamao e iai le malo o Iapani, Singapore, Taiwan, Ausetalia, Amerika ma le malo a Peretania e fesoasoani i galuega laveai ma le sailia o i latou ua maliliu ona ua tanumia i fale ua malepelepe ma solofa mai i lalo ona o le matautia o le lulu o le mafuie.
Afai o loo iai ni popolega i aiga ma uo ua leai se fesootaiga, e mafai ona e faafesootai le telefoni 0800 733 276 o le Red Cross Personal Inquiry Line, logo i se sui o le Red Cross pe mafai ona siaki ou aiga ma uo.
Afai e lē o mafai ona e talanoa atu i nisi o aiga poo uo i Kalaiesetete, ma e te lē o mautinoa poo fea o iai nei tagata, e mafai ona e faafesootai le telefoni 0800 435 700 Red Cross, ma e fesiligia le latou fesoasoani e saili poo fea o iai tagata ia o lo outou aiga.
E mafai ona e faafesootai le numera 0800 779 997 pe a e fia silafia atili le ituaiga fesoasoani e mafai ona fesoasoani atu ai le matagaluega a le Malo mo oe ma lou aiga.
E toatele nisi ua fesili mai poo le ā se mea e mafai ona tatou faia e fesoasoani ai i nai aiga ua aafia ona o lenei faalavelave.
Ou te talosagaina ina ia aua ne‘i vavevave. E moomia pea sina taimi e sailiili mae‘ae‘a ai e i latou ua agavaa ma iai le tomai faapitoa e galulue e faatino lenei galuega faigata, o le sailia o tino o i latou ua maliliu ma o loo tanumia i fale ua faaleagaina.
O loo lapatai mai foi, e lē o saogalemu le tele o fale ua faaleagaina ma e lē tatau ona soona o iai ne‘i toe afaina ai nisi.
O loo ave le faamuamua ia i latou ua malaga faapitoa atu i Kalaiesetete mo le faatinoga o galuega faafomai, ma galuega faapitoa o le sailiga o tino maliliu ua tanumia i fale ua faaleaogaina.
E moomia foi se taimi mo aiga ua maliliu o latou tagata e faamavae lelei ai ma ē ua maliliu i lenei faalavelave.
Se‘i o‘u faafesootaia nisi foi o tamā matutua o le tatou Atunuu faapea foi nisi o susuga i faafeagaiga o loo afifio i Niu Sila nei ma soalaupuleina poo fea o iai le tofa ma le faautautaga, ona toe logo atu lea poo le ā so tatou sao e talafeagai e fesoasoani ai mo tatou aiga, uo ma ē ua masani o loo puapuagatia talu le mafuie i Kalaiesetete.
O loo matou galulue faatasi ma Minisita a le Malo, faapea foi matagaluega eseese a le Malo ina ia maua le fesoasoani o loo manaomia e i latou i Kalaiesetete.
O loo iai fale i nofoaga lē tumau i Kalaiesetete o loo maua i ai moega e mālōlō i ai, ma e maua ai foi taumafataga.
E mafai foi ona faia talosaga i le Ofisa o WINZ pe afai o loo iai se mea e manaomia ai se tino i tupe.
O le Ofisa o Red Cross ma le Ofisa o le Salvation Army, o nisi nei o Ofisa e mafai ona faafesootai vave pe afai o loo iai lava se mea o loo manaomia e se aiga o loo mafatia tele i Kalaiesetete.
O loo lapatai mai e le matagaluega a le Malo ina ia faaeteete i le faaaogāina o le vai taumafa.
E tatau lava ona faapuna uma le vai taumafa nei mea ane ua pipisi se faama‘i auā ua faaletonu ala paipa o loo feaveai ai le suavai taumafa.
O loo lapataia mai foi lo tatou Atunuu ina ia faaeteete i tagata taufaavalea o loo aoina tupe ma le faaupuga e fesoasoani i le faalavelave i Kalaiesetete, ae e lē o iloa poo fea o ave i ai nei tupe e lē o oo atu i Kalaiesetete.
Ina ua mae‘a le toe sauniga matagofie e faamavae atu ai i se tasi o alo o le atunuu lea sa tautua faafitafita ma maliu mai ai i Afghanistan, ma sa faia lea i le EFKS i Manurewa i le Aso Faraile, sa ou malaga ai loa e asiasi ma feiloai atu i nisi o le tatou atunuu i Kalaiesetete ma Dunedin.
E lei umi se taimi o o‘u i Kalaiesetete. Sa ou feiloai atu i nisi o taitai o lea aai, ma fesiligia ai matagaluega a le Malo i le fesoasoani o loo ave i tagata.
O loo faapea mai le lipoti a se tasi o matagaluega, e lē o tele se afaina o vaega o loo aumau ai le toatele o le tatou atunuu, ma o loo fesoasoani malosi ia i latou ua faaleagaina o latou fale i le mafuie.
O faalavelave faapenei e faamanatu mai ai le tāua o le tatou nofo sauni, ia tatou lava tapega mo faalavelave faalenatura.
