Ua lua faiganuu a Leauvaa mafua ona ole faateaina o ni matai

Le ata ole afioga Sala Fata Pinati male afioga Tuala Iosefo Ponifasio ile pito i luma ma nisi o matai ole afioaga o Leauvaa
Le ata ole afioga Sala Fata Pinati male afioga Tuala Iosefo Ponifasio ile pito i luma ma nisi o matai ole afioaga o Leauvaa

“Ole Afioga ia Sala Vaimili II male Afioga ia Tuala Iosefo Ponifasio o suafa faalagilagi ia o lenei nuu, elē mafai ona faateaina ese tasi poo se suafa mai le afioaga nei”

Ua faafofoga Samoa ile alu ole tala ma lipoti ile faatulai ese ma ua anetema nisi o suafa ole afioaga o Leauvaa le afioga Sala Vaimili II, Tuala Iosefo Ponifasio, ma Sala Iose McCarthy ise finagalo o Tevaga ma Vaifale ise fono na taloina e nei suafa ile masina ua mavae.

Na fesiligia se matai o le nuu pe ose faaiuga e fesootai male tagi ua taoto ile faamasinoga faaitumalo faasaga ile faipule male Minisita o Leoleo ma Falepuipui le afioga Sala Fata Pinati ae ole tali e leai.

Peitai o lea ua faasalalau nei e matai ua faia iai le faaiuga le faatu ose latou faiganuu fou ona ole faaiuga ua faia e pei ona latou faaalia ile faasalalauga, e faapolokiki ma ua tosoa‘ina ai fua male finagalo o Alii ma Faipule ole afioaga ae e lē o atoa tino o Vaatausili ile faia o lea faaiuga. Ua teena nei e lenei nuu le faaiuga faapolokiki, na usuia ele komiti faatosina (Campaign) e lagolagoina le afioga Sala Fata Pinati, ina ia faaaogā le tofa a Alii ma Faipule ole afioaga o Leauvaa, e ave ai i tua le tagi i solitulafono faatosina o le palota ia Mati 2016, ua ile fogaalemalo.

Ole mafuaaga moni lea na latou faia ai se faaiuga lē talafeagai e faatea suafa o lenei nuu le afioga Sala Vaimili II, male Sa‘oalii ia Tuala Iosefo Ponifasio ma isi suafa, atoa ai ma tulafale ole Tupua i Gafoaga ua faapea mai ua “anetema i latou e faavavau”.

O lea faate‘aga ua lē tusa ai ma tu ma aga a lenei afioaga o Leauvaa, le aganuu faasamoa, tulafono faamasinoga ma faalemalo male faakerisiano. O se vaega lea o le faasalalauga e tusa o lenei mataupu.

Sa fono i latou ile aso 21 o Me 2016, na fono ai le Tupua i Gafoaga ma autasi ai e faatu se faiganuu fou e pei ona faamatalaina ile faasalalauga e saoloto atoatoa, e alofa ma faamāmā avega, ae lē pulepuletutū ma faapologa i faiga faapolokiki.

Ua faaalia ai foi o tagi ua i luma nei ole faamasinoga elē aiāina ele nuu o Leauvaa. Ole tagi faasaga ile afioga Sala Fata Pinati oloo tagi ai Sala Iose McCarthy sa tauva ile palota tele mole vaega faaupufai ole Tautua Samoa.

Ole tagi faasaga ile afioga Tuala Iosefo Ponifasio oloo faaulu e ni sui se toatolu ole komiti a Sala Fata Pinati. Oloo tuua‘ia e nisi o matai e lagolagoina le faipule e faapea ole tagi ua faia e Sala Iose oloo lafi mai ai i tua ni taaviliga faapolokiki a matai ua faatulai ese male faiganuu.

Ile faasalalauga lava ua ta‘ua oloo faamaonia mai ai e faapea:

Ua lua pulega nuu ile afioaga o Leauvaa.

Ua teena le faasalalauga lē atoatoa ma faaupuga lē sa‘o a Tuala Telea Lilii i luga ole ea ma alaleo na lipotia i Samoa ma atunuu i fafo ua agia ai se tofa mase faautaga faaletonu a lenei nuu.

O tagi oi luma ole faamasinoga e uiga ile palota, elē aiāina ele nuu o Leauvaa.

Ole afioga Sala Vaimili II male afioga Tuala Iosefo Ponifasio o suafa faalagilagi o lenei nuu, elē mafai ona faateaina ese tasi poo se suafa mai le afioaga nei. E leai foi se mafuaaga tatau na ala ai ona latou faia lenei faaiuga sese ua mafua ona oo ai lenei afioaga i tulaga ua iai nei.

Matou te faamaualalo atu Samoa pe a ua iai se aleu o lenei afioaga i lau faafofoga mai.

Oloo sainia le faasalalauga e tulafale Tupua i Gafoaga, Leauvaa.