Na malolo Samoa ia Sepania ile taaloga faaiu i Monaco. Ole taaloga lea na sue ai le ‘au e ofi ile Olimipeka i Rio. Ole faigata, ona ole sekone mulimuli ole taaloga na sikoa ai Sepania ile tulimanu, ma sili ai ona ‘ai ia Samoa.
E maoa‘e lea tulaga, ona o Sepania, elē ose atunuu e masani ile Fitu, poo le lakapi foi. E lei iloga foi sona faatulagaina ile taamilosaga, a‘o Samoa na faatulaga ole ‘au numera tasi i le taamilosaga i Monako. A‘o lea ua toilalo Samoa ia Sepania.
O Sepania, e leai ma se isi na faamoemoe e maua sona avanoa e malo ai i Monaco ae o Samoa na muamua i manatu ole toatele e sao atu i Rio. Pau ‘au na taumamate e faalavelave ia Samoa o Toga ma Rusia. Peitai, elē o ‘au ia, a‘o o Sepania ua faatoilaloina le Manu Samoa.
Ile faia‘ina ai ole Manu Samoa ia Sepania, ua maitauina ai le faanoanoa ole atunuu, e pei ona maitauina i finagalo faaalia i luga o upega tafailagi faapea fesootaiga televavave, e pei ona faaalia ai lagona faanoanoa ole alii faasalalau ale TV1, ia Sioeli Taulealeausumai.
“Ua ou lagona lava male agaga faanoanoa male lē fiafia. E faamalo ile ‘au mole taaloga, ae e faigata tele o‘u lagona ua oo iai.” Ise finagalo ole alii Tusitala o Peter Rees na ia ta‘ua ai, E lei to‘a Samoa ma faia‘ina ai ia Sepania.
Na amata le taamilosaga a Samoa i le manumalo ia Toga (26-0) ile taaloga muamua, ae sosoo ai male faia‘ina ia Aialani (21-27) ile taaloga lona lua, ole taaloga lona lua na malo ai ia Zimbabwe (21-7) ole taaloga mulimuli foi lea ole aso muamua.
Na sili Samoa ile pulu lea, sao ai ile kuata faaiu lea na manumalo ai ia Hong Kong (31-12). Sosoo ai male manumalo ia Siamani ile Semi (26-14) ona sauni atu ai lea i lana taaloga faaiu. O Sepania na malo ia Mexio ma Korea, ae na faia‘ina ia Hong Kong, le ‘au na faatoilalo e Samoa ile kuata faaiu.
Ile taaloga ole kuata faaiu a Sepania ma Aialani, lea na faia‘ina ai Samoa ile aso muamua, na pigi ai e Sepania Aialani ile 12-7. Sosoo ma lana taaloga semi ma Rusia ma manumalo ai i ‘ai e 17-12.
Na fetaui Sepania ma Aialani, lea na faia‘ina ai Samoa i lana taaloga lona lua, ile quarter final, ma manumalo ai Sepania i ‘ai e 12-7, ae o le semi final na fetaui ai ma Rusia ma manumalo ai foi i ‘ai e 17-12.
E ui i ia manumalo a Sepania ia Rusia, ose tasi ‘au malosi ole taamilosaga, e lei iai lava se manatu ole autapuai ale Manu Samoa ole a faia‘ina ia Sepania. Ua na ose taaloga faaopoopo ale Manu ile agai atu ile Olimipeka i Rio.
Peitai, ile taaloga faaiu, na malosi mai Sepania. E lua ana sikoa sosoo ile minute muamua male minute lona lima ole taaloga. Na tuai ona tali Samoa ae na tali lava, ile minute faaiu ole ‘afa muamua ina ua sikoa Alex Samoa, toe sosoo ai male sikoa a Ed Fidow. Na ova uma kiki a Tila Mealoi ma sili ai loa Samoa i ‘ai e 14-12.
O Samoa na muamua sikoa ile ‘afa lona lua, ile minute lona lua ile alii o Belgium Tuatagaloa, ae na misi le kiki a Mealoi, ma tulai mai ai ‘ai ole taaloga, Samoa 19-12 Sepania.
O iina loa na gata ai le malosi ole Fitu ale Manu ae amata ona fai faiga a Sepania. Na maua e Sepania le sikoa ile minute 15 ole taaloga ae misi le a‘a, Samoa 19-17 Sepania.
Ile toe minute lava ole taaloga a‘o sili pea ‘ai a Samoa ae toe maua ai loa le sikoa faaiu a Sepania ile tulimanu. E lei popole ile kikiina ole polo auā ua latou mautinoa ua manumalo ia Samoa i ‘ai e 19-22.
Ile saunoaga a le kapeteni a Sepania ina ua mae‘a le taaloga na ia ta‘ua ai, “Oute lē o talitonu ile matou sao atu ile Olimipeka. Oloo tau seki le lagona auā ose mea ese lea mole matou ‘au. Ole a matou tapena loa mole Olimipeka e faaauau le faamoemoe mole ‘au, faapea o matou aiga aemaise Sepania.”
O Sepania ole ‘au mulimuli lea ua ofi atu ile taamilosaga. E sefulumalelua ‘au ole a tauva ile Pine Auro ile taaloga taitoafitu i Rio de Janeiro, Brazil. O ‘au la nei: Fiti, Aferika i Saute, Peretania, Ausetalia, Amerika, Argentina, Falani, Kenya, Niu Sila, Iapani, Brazil ma Sepania.
