Ua lē o toe pepe le fusu a Joseph Parker

O se tasi lenei o faipelega i le va o Joseph Parker ma le alii Amerika o Brian Minto faamauina i talafaasolopito i le maualuga le toatele o tagata na maimoaina ona o le siisii pea i luma o le taumafaiga a lenei alii fusu o Joseph Parker faatasi ai ma le alii faiaoga ia Kevin Barry.

Manatua o le alii lenei o Brian Minto na ia matuai faatoilaloina leaga lava le alii o Shane Cameron i le ono poo le fitu masina talu ai. O se tasi o vaega mataina i le alii lenei o Joseph Parker e lē ono vaaia ni ona foliga matapaū pe tafitifiti i le maea na o si ona laufofoga mataataata lava filemu e pei se tagata valea ae o loo nanā mai ai i totonu lona tagata atoa i le fusuaga. E mafai ona faaupu faapea e sili atu le pe‘ape‘a o lima nai lo le tele o faamatalaga ae leaga lima. O le isi eseesega tele o tausaga o nei alii fusu o Joseph Parker e 22 tausaga a o Brian Minto e 39 tausaga.
E agai mai Joseph Parker i le fusuaga lenei ma le atoatoa lelei o ana tapenaga i le mafaufau ma le malosi, o se alii fusu o loo atagia atoa mai ai le atoa lelei o le tagata. Tele vaega o le fusuaga a Joseph Parker ua iloa ai le telē tele o lona avanoa e siisii atu ai pea i luga lona tualaga i faipelega tetele faapolofesa i lenei taaloga poo le faagatama.

Na matuai lē mafai lava e Brian Minto ona tatalia mai le vave saoasaoa toe malolosi o aao o Joseph Parker i le fusuaga i le po o le Aso Toonai. O loo faaigoaina lea malosi ese e le alii faiaoga o Kevin Barry o le “piston”, ina ua pa‘ū Brian i le mae‘a ai o le taamilosaga lima ona o le malolosi tele o le taumatau a Joseph.
Masalo o iina na iloa ai e Brian Minto ua lata o ia i le tuugamau ina ua toe osofaia foi e Joseph i le taamilosaga fitu ma toe pa‘ū ai foi i totonu o le maea, o iina na filifili ai loa Brian ua lava lea fusuaga ua matuai masofasofa lona isu aemaise le lē mafai ona tatalia le saoasaoa, vave toe malolosi tele aao o Joseph Parker.
O le a‘e manuia ai lava o lea fusuaga a Joseph Parker ua ia umia ai nei le fusi o le WBO Oriental Heavyweight Belt, ma le WBA PABA ma e foliga mai e ono vave maua se isi fusuaga a Joseph Parker i se taimi lata mai i nisi o setete i Sasae o Amerika.
Mo le alii fusu ia Joseph Parker e foliga lelei se lumanai o lea ua atagia mai mo ia i lenei taaloga, ina ua mafaia ona pa‘ū le 6-kilo o lona mamafa, ae foliga ua matuai faateteleina le malosi o le alii fusu i le taimi nei.

Na lei toe faatali Kevin Barry e faailoa lona tulaga talitonuina o Joseph Parker e manuia i lea fusuaga aemaise ai o lona mulimulitaia lea o le faataatiaga na fuafuaina e faatoilaloina ai le alii o Brian Minto.

Faapea mai Kevin Barry, o se manumalo sa fevailiai ma ua atagia ai le matuā faaaliifusu ai o Joseph Parker i totonu o le 12 masina o nei tapenaga, ma ua avea foi lea ma auala ua malamalama lelei ai i le taaloga o faipelega poo fusuaga foi.
Amata mai lava i le amataga o lenei fusuaga le iloa mamao e Joseph Parker e lē faatusaina lona malosi o loo iai ma le taumafai mai o le alii o Brian Minto, ae sa onosai lava na faatalitali i le avanoa e faauma ai loa le fusuaga, peitai ane ua a‘e se tofa ia Brian Minto ua lava lea fusuaga ma na te lē mafaia ona faatoilaloina Joseph Parker, ae o loo faatali mai lona aiga ma le fanau, ma e tele isi mea e mafai ona fai nai lo le tuulafoai atu o ia e tafilisaunoa i ai Joseph Parker ma taofia ai loa le fusuaga.

Ua tautino Brian Minto o loo telē se lumanai o Joseph i lenei taaloga, ae o le auala e fai ia amatamata lelei atu lava seia oo lava i le tumutumuga, ae aua le vave fosia i luga ae tāua le faifai mālie lelei atu i lalo ma agaigai atu ai i luga, ma mautinoa ai lona faaeaina mulimuli mai.

O se taaloga o faipelega e ese foi le matagofie ma le tamalii o alii fusu uma e toalua, e leai ni uiga faamaualuluga ae sa feofoofoai faamanuiaga i le agaigai i luma i faipelega.