A o lumanai le uluai fetauiga a le All Blacks ma le Wallabies o le Taamilosaga o le Tafatolu 2010 i le faaiuga o le vaiaso nei, ua feagai nei le ‘au a Ausetalia ma se faafitauli ona o le misia o le alo Samoa saoasaoa i le tulaga o le uigi, le alii o Digby Ioane.
O Ioane na mataina lana taalo i taaloga amata a le Wallabies o le tausaga a o malaga taamilo mai Egelani ma Aialani i Ausetalia, peitai na faamanu‘alia ai le tau‘au o le alii ma malolo ai mo le fa vaiaso.
O le taaloga la lona lua o le Tafatolu a lana ‘au o lona uiga o le vaiaso nei, na faamoemoe le faiaoga e toe taliu mai ai Ioane mai ona togafitiga. Peitai o se tala faanoanoa mo Robbie Dean ina ua toe see le tau‘au lava lea e tasi na taoto ai Ioane, a o faataitai lana pue ma ana toleniga i tua lava o lona fale ma lona uso laititi o Jay.
E lē gata ua toe āfaina le alii, ae o le a misia le taamilosaga atoa o le Tafatolu e fua i le ono masina e toe faia ai le isi taotoga.
Fai mai Ioane, o le mea sili ua tupu i taimi a o koleni, ae lē o totonu o le malae pe a feto‘ai ma Maa Monu.
O Ioane ua 25 tausaga o lona soifua ae 11 taaloga ua taalo ai mo le Wallabies a Ausetalia talu mai le tausaga e 2007.
Ua ia faailoa foi lona alofa i si ona uso laititi i le mea ua tupu, ona o loo popole le alii o Jay i iloa e lo la tamā.
O Ioane na faamoemoe le alii Faiaoga o Robbie Dean e faataalo i le taaloga lea ma le All Blacks ona o lona malosi e mafai ona sao mai ai i ni puipuiga malolosi ma ni pue a le ‘au Samoa lea e faataumoa atu i le ‘au a Niu Sila.
Sa maualuga i le mafaufau o le alii o Ioane le taaloga lea e fia taalo ai, ona o le a faia lea taaloga i Melbourne le aai na to‘ai taunuu atu i ai lona aiga ma aoga ai, ina ua faato‘ā taunuu atu mai Niu Sila nei.
Na te manatua foi le taaloga muamua a le All Blacks i le 1997 i le malae lea, ae faato‘ā 12 ona tausaga.
O le faaiuga o le vaiaso lea e iloilo ai le malolosi o manu e lua o le Kiwi ma le Kagalu, a o faagasolo le Tafatolu o le 2010.
