Afamasaga Ioane Toleafoa & Maupu Yvonne Sulu
A o faagasolo le osigafeagaiga i le sakalameta o le faaipoipoga a le Afioga Afamasaga Ioane Toleafoa ma lana manamea le tamaitai lalelei o Maupu Yvonne Sulu, sa patipati ma loifofoga o le fiafia le aofia atoa sa faatasi atu ai, ma latou molimauina lenei sauniga mamalu.
O le Aso Toonai, 18 Iulai 2015 sa faamauina ai lenei feagaiga paia o le faaipoipoga, ma sa auai atu aiga, o uo ma molimoli a latou faamanuiaga ma moomooga alofa mo le ulugalii ua faapaiaina le la osigafeagaiga.
O le alii faaipoipo, o le alo ulumatua o le afioga Toleafoa Kalolo & Ateliana Lepou mai afioaga o Fasitootai & Lepea, ae o le tamaitai faaipoipo o le alo tamaitai ulumatua o le afioga Taulepapa Magele Tuilimu Isaia & Maria Fatima Ta‘e Sulu mai afioaga o Leulumoega Tuai, Iva & Faleapuna.
O le susuga i le faafeagaiga, Rev Nomenita Simanu na faimalaga mamao mai lava i Lefaga i Samoa ona o le fia molimauina o lenei aso tāua, ma o lana feau sa manao ia faaoo mai lava i le ulugalii fou e faapea, ia avea le Atua ma totonugalemu o la oulua faaipoipoga e pei ona tatau ai i soo se faaipoipoga.
O le Pule o le Tausamaaga i lea aso (MC), na tulai ai Vaafusuaga Leamy Toleafoa, o se tasi o sui tuai o le Manu Samoa & faatasi ai ma Toleafoa Kalolo Paaniani Toleafoa II sa iai i le laina o alii uosili, ma o se isi foi sui tuai o le ‘au a le atunuu le Manu Samoa.
Sa momoli foi le faafetai tele a le ulugalii fou i o la aiga uma, o uo ma aumea mamae sa mafai ona auai mai i lo la aso fiafia, aemaise foi i latou na faimalaga mamao mai lava i isi atunuu ona o le fia auai i lo la aso fiafia.
Ia manuia tele le aiga fou , ma ia fua tele le niu!
