Ua Faamuta e le Ekalesia Manumalo Papatiso le tautua a le latou Faifeau

E foi mai le susuga i le faafeagaiga ia Lemuelu Seumanu mai Samoa ina ua mae’a le falavelave a lona aiga sa faatasi atu i ai, ua mae’a ona fai le faaiuga a lana ekalesia e lē toe mananao e avea o ia ma faifeau i totonu o le lotu.

O atugaluga ma lagona lē fiafia o le aulotu e pei ona latou faia ai lea faaiuga i le faifeau, ona ua lē lavatia ona onosaia mea na tutupu i totonu o le ekalesia, e mafua mai lava i le susuga i le faafeagaiga.

Ta’ua e sui o le ekalesia Manumalo Papatiso, i susuga i a’oa’o faapea toeaiina, o le tupe teu a le ekalesia sa iai, e silia i le $40,000.00, na tala mai ai le $10,000 ina ua manao le faifeau i se seleni e alu ma ia e asi ai lona tuaa ua gasegase, ma o lea sa tala mai ai loa le $10,000.00.

Peitai ane ina ua tuumalo le tuaa o le susuga i le faafeagaiga i le tausaga ua mavae, sa fono ai le ekalesia e tatau ona alu se sii, e faigata ia latou le va nonofo ai ma o latou mātua faaleagaga.

Talu ai e tupu mai le faalavelave o loo i Samoa le faifeau i le latou aiga, ma ua faafaigata foi ona tala se tupe mai le tupe teu a le ekalesia auā o le faifeau o loo saini ai faatasi ma le fofoga o le ekalesia ma le teuoloa a le ekalesia.

O lea na latou savalia ai se tasi o aiga lotu i totonu lava o le ekalesia e aitalafu mai ai se tupe e ave ai le sii auā e lē o mafai ona tala se tupe.

O lea na aitalafu mai ai le $10,000 mai se tasi o aiga lotu, e ave ai le sii i Samoa ma fesoasoani i pasese o sui o le ekalesia lea ua malaga, ma le faamoemoe e toe foi mai le malaga faatasi ai ma le faifeau ona tala mai lea o se tupe e totogi ai le seleni a le aiga.

Ina ua malaga sui o le ekalesia i Samoa, ae faafeiloai mai e le to’atama’i o le faifeau ina ua o atu faatasi le ekalesia; o le mau a le faifeau o le tagata alofa moni e faailoa lona alofa i le mea e sau i lana taga, ae lē o le faaaogā o tupe a le ekalesia.

O le aso muamua lava na feiloai ai le faifeau ma sui o le ekalesia. Na ta’ua e le ekalesia, o le latou feiloaiga muamua lea ma le latou faifeau i Samoa, e foi mai lava le malaga e lei toe oo atu le faifeau latou te feiloai.

Ina ua taliu mai i Niu Sila nei nei o sui o le ekalesia na malaga, ma faailoa i le aulotu mea sa tutupu i Samoa, o iina na tupu ai se lagona i le ekalesia ua tatau ona fai se fuafuaga i le latou faifeau auā ua lē tasi lē lua mea ua tulai mai i totonu o le lotu ae o loo onosai lava le ekalesia.

O nisi vaega ua faamautuina ai lagona o le ekalesia Manumalo e lē toe manano i le faifeau, e ala lea i lona aveeseina o le saini a le failautusi sa iai i le tusitupe a le aulotu le afioga ia Lilomaiava Scanlan sa fai ma fofoga o le ekalesia faatasi ai o lona talaina o tupe a le lotu e aunoa ma le talanoaina e le ekalesia.

E iai le tupe a le aufaipese sa teu e $2,800, ae sa tala foi e le faifeau le $1,000 ma ia faaaogāina, lea na toe fesootai i ai le aufaipese mo se piano a le aulotu peitai ane sa aumai le $900.00 ma le faaupuga e tuu le isi $900.00 ona o loo iai foi lana fanau i totonu o le aufaipese.

O le isi atugaluga o le ekalesia, ona e lē nofo lelei le latou faifeau e vaai le lotu, e tia’i le ekalesia i le tai fia masina ae alu i Samoa ma Tutuila ma nofo ai, ae tuu le aulotu i a’oa’o ma tiakono.

O le malaga mai o le faletua ma lana fanau ina ua mae’a le faalavelave i Samoa, na alu ai loa le savali a le ekalesia ua lē toe mananao ia Lemuelu Seumanu e fai ma faifeau. Ma ua suia foi le igoa o le lotu e lē toe faaigoaina i le Manumalo Papatiso ae o le a faaigoa i le Papatiso Samoa i Magele.

Na malaga mai le faifeau i Niu Sila, ma taumafai e fofo le faafitauli, lea sa toe fai ai loa le leleiga e le susuga i le faafeagaiga ia Faasoo Auvaa, ae lei mafai ona tuufaatasia ai lava le lotu i lea taimi.

Peitai ane ua toe tulai mai le faafitauli i le tupe a le aufaipese ma ua mausali ai loa i finagalo o le aulotu e lē toe mananao i le faifeau, seia oo mai lava i le taimi nei ua fai lava le latou lotu lea ua faaigoaina i le Papatiso Samoa Magele ae o loo vaaia e a’oa’o ma toeaiina, ae ua alu foi le faifeau fai lana ia lotu.

I se feiloaiaga ma le susuga i le faafeagaiga ia Lemuelu Seumanu na ia teena ai nei tuua’iga uma. Na ia faamanino mai e faapea, o lona lē manao e alu atu se sii tuufaatasi a le aulotu i le maliu o lona tuaa, ona e iai lona manumanuga i le faaaogāina o tupe a le aulotu, ua lava lea $10,000 sa avatu muamua. Na ia faailoa foi le manaia o le latou mafutaga i Samoa ma sui o le aulotu na malaga atu ma sa maua foi le latou feiloaiga fiafia.

O loo tetee foi le faifeau i le $1,000 sa ia talaina a le aufaipese, sa ia toe faafoiina le tupe i totonu o le ekalesia ae faailoa ni finagalo a nisi o le ekalesia, o le a toe aumai lava lena tupe i totonu ae lē tuu ia ma le faifeau. I le tulaga i le lotu, e leai sana lotu ua faia, ma e lē o iai foi se mea o tupu i le ekalesia i le taimi nei auā o lea ua uma ona fai le leleiga.

O le mafuaaga foi lea o lona faauuina o tofi a’oa’o o le ekalesia ina ia tuu i ai le lotu auā o ia o loo fai ma alu i Samoa e vaai le isi galuega ma o loo faiaoga foi i Tutuila i le ekalesia.