Ua oo atu nei i nofotane ole afioaga o Faleaseela Lefaga le faatamaoaigaina o Nofotane i Samoa. Ole polokalame lea ua savali nei ile lua tausaga talu ona faasavali i itumalo ma ekalesia i totonu ole atunuu, aofia ai Upolu nei ma Savaii.
Ma oloo faapea ona tulituliloaina pea e le tatou nusipepa ia taualumaga uma. Ole agaga ole polokalalame ina ia faa’oaina ma faatamaoaiga ina lima o ma mafaufau o fafine nofotane ile atunuu, ina ia tuumamaina ai le ola faamoemoe, ae tutoatasi pei o faanaunauga o Malo Aufaatasi, United Nation lea oloo latou faatupeina lenei polokalame i lona umi e tolu tausaga.
Ole agaga ina ia, e le gata ole faatamaoaigaina o nofotane i soo se auala, ae ole soifua maloloina i itu tau i tupe maua, ole tausia o fanau, aiga ma avea oni faataitaiga lelei I fanau tuputupu a’e.
Ole vaiaso talu ai na talimalo ai le ekalesia EFKS i Matautu Lefaga, Rev Lauama ma le faletua ia Arieta Fonotele. Na molimauina ai le talisapaia e lea pitonuu o Lefaga ole polokalame, ma le faafetai ua maua so latou avanoa.
O tina na oo atu iai le polokalame lenei ile tauasga talu ai, e toe oo atu iai le polokalame ile tausaga nei, ua tapena lava latou mo le isi laasaga ole polokalame. Pei lea ole faiga o failaufala, mo mea taulima, fai togalaau matagofie, mo le tuiina o teu.
Ile talanoa a le tina ia Valasi Tuala o Safaatoa, “Ole tele o lo’u togalaau ua ma ona tapena ma saunia, ae ole faaletonu ou te leiloa tui le teu. ”O lana faafetai ile polokalame lenei, aua o lea ua mafai ai ona faaaoga lona togalaau, ua iloa tui le teu, e faatau, ua avea ai nei ose tasi alaga tupe i lona aiga. Ua umi tele e na’o lona toalua lava sa faigaluega ma maua ai tupe e fai ai mea faalenuu, aiga, komiti, lotu, aoga a tamaiti. Ae o lea ua faaoaina ona lima e le Toomaga ma lana polokalame, ua avea ai o ia ose tagata fou.
Na talanoa foi le tamaitai o taitaina le polokalame lenei ia Tumua Faafete, “pei ose taui lelei mo ia, lona vaai atu lea ile gasolo mai a tina ma latou laufala, ma fugalaau, e a’o ai le faaaogina o nei oloa ua mafai ona faaoloaina ai nofotane o Lefaga.
Ae ole auga o aute, o lona faalogo atu lea ua fai mai molimau a nofotane taitasi, ona o faamanuiaga ua mafai ona latou maua. Pei ona molimau le tina ia Valasi, ina ua ia iloa atu le ituaiga o tupe ole a ia maua ile lumanai. I tina lava ia ole afioaga o Faleseela Lefaga, ole tele oi latou ua mafai ona faaopopoina e lenei polokalame o latou silafia, ile faiva alofilima.
E aofia ai le silafia e faia kuka eseese, meataulima, tuiina ole teu fugalaau ma le faiva ole eleiina o lavalava, ua o faatasi lava ma isi tomai fou ua latou maua nei.
Ole isi faigateu fou lea ua aoaoina ai tina o Lefaga ma Faleseela, ole lalagaina lea ole fuagalaau e fai ai le teu. Ole aotelega o lea polokalame i Lefaga, e uma ane, ua 15 nofotane ua lesitala ile faiga o a latou pisinisi laiti.
Ma ole a faaauau ai pea le iai ole sui ole Toomaga ile afioga o Faleseela ma Lefaga ona tulimatai gaioiga ma fesoasoani ile faatumauina ole silafia ae ole fiafia o nei nofotane ile faiga o a latou pisinisi.
Ole taunuuga tonu lava lea ma le faamoemoega ole polokalame Nofotane, pei ona saunoa le Peresetene, Siliniu Lina Chang, ina ia faatamaoaigaina Nofotane uma o Samoa, ma ia tumau ai pea lo latou faalupega mai anamua, o ia lava ole Nofotane, aua ne’i suia fua.
Na afua ona taulai lenei polokalame i Nofotane, ina ua uma ane suesuega ma aoaoina faamatalaga o faalavelave ma sauaga tutupu i Samoa, e taunuu ane ile Toomaga mo ē Puapuagatia, oloo laualuga ai lava le numera o fafine nofotane i sauaga tutupu mai aiga, aemaise o nuu i tua. Oloo faafetaia ai le faafeagaiga ia Lauama ma Arieta Fonotele ma le ekalesia ile talimalo lelei.
