Poo fea e nofo ai le Isaraelu moni e susue lava lona faamalama ma silasila i lona atunuu ma lona aiga auā e pele i le loto.
E fetaui tonu lea fuitau a le Tusi Paia ma le olaga o soo se Samoa o aumau i soo se tulimanu o le lalolagi, auā e tiga ona nonofo mamao ma fai le tautua aitau malele mo aiga ma nuu ma le atunuu, ae lē mafai ona aveesea le lagona o le faiaiga lelei.
O le tulaga foi lea ua matauina pea i nei aso i le aumau ai o o tatou aiga i atunuu mamao, e lē mafai ona tuua le manatu mai i le tausiga o le aiga ma le nuu e ala i suafa matai auā o le faasinomaga lea o soo se tagata Samoa.
Ua tatou iloa foi ma mautinoa i nei aso i le malosi o le faatāua o aiā tatau o tagata, ua liliu ai foi ma le tofa i aiga ia aua ne‘i taga tasi le filiga o ni nofo i ni suafa matai ae ia faasafua i suli ma feoi e le gata ia paleni le itupa o alii ma tamaitai, ae ia faasafua suafa o aiga ona o nei aso ua toatele suli ua nonofo mamao i isi atunuu ma o nisi foi ua uluola ai o latou aiga ona ua soifua ma fananau i fafo fanau.
I le afioaga o Lano i Savaii i le aiga o le afioga Vui Nafoua‘ina na faatino ai lea tu ma aga masani a Samoa o le faaeeina o suafa matai o le Vui, e pei ona sa malaga mamao mai fafo nisi o suli ma feoi o le suafa auā le faamoemoe.
E toa sefulu i latou na faaee i ai lenei suafa maualuga o le nuu ma le atunuu, ma o se suafa foi faasa‘osa‘o e tausia aiga. E toatolu suli tamaitai o le aiga na autasi le aiga potopoto ua tatau ma onomea ona ave i ai le suafa ona o le tautua a o latou foi auaiga aemaise o tuaa ma mātua.
O i latou nei e aofia ai le afioga Vui Elena Faamoe Timoteo mai Niu Sila, o Vui Ta‘eleasaasa mai Niu Sila ma le afioga Vui Faaopoopo Taua‘anae. Sa faaee foi le suafa i nisi lava o le aiga o Vui Nafoua‘ina e pei o se tasi o tamā ua matua le soifua ua aulia le 80 tausaga o lona soifua o le afioga Vui Tavita Vui Talitu.
Faaalia e le tamā matua ua leva tausaga o taoto le finagalo o lona aiga ua tatau ona tulai mai i le suafa ae o lana saunoaga, sa manatu lava i nisi o lona aiga tino i matutua sa iai, aemaise o ia e aumau i Niu Sila ma lona aiga o le itu lea sa faatuai ai.
Peitai ua oo mai i lenei vaitau ua leai nisi matutua o lona aiga toe o ia, o le mafuaaga lea ua manatu ai loa ua tatau ona pale i le suafa, ma o le a taumafai lava e malaga i Samoa e faatino tiute masani o matai pe a iai ni faalavelave poo isi atinae mo le lelei o aiga tainane o faamasinoga e manaomia ai matai o aiga.
O le tausaga e 2005 na muta mai le faia o ni saofai a le aiga o Vui Nafoua‘ina i le suafa Vui, ma ua sefulu ai nei tausaga a o lea faatoa toe iai se finagalo o suli ma le aiga potopoto ua tatau ona toe filifili nisi e tausia le aiga.
Na autasi le aiga e faatino ni saofai i le suafa Vui ina ua tuanai le tuumalo o le afioga Vui Ola i le tausaga e 2013. O nisi o suli sa faaee i ai le suafa e aofia ai Tupai Alaovae mai Aukilani Niu Sila, Liumalo ma Saito o suli e mau lava i le aiga i Lano i Savaii.
