‘O le faamoemoe ua taunuu o le laau lea o le soifua’. O se faigauo mamae sa fofoa mai ma le faamoemoe i se aso, ona osia lea e ala i le sakalameta o le faaipoipoga, auā ua atoatoa le faamaoni o le alofa.
Ma o lea sa faataunuuina ai o la moomooga ina ua faapaiaina i laua i le aso 11 Ianuari 2014. O se sauniga sa faia lava i le malumalu o loo tapuai ai le tamaitai faaipoipo ma si ona tamā ma lona auaiga, i le ekalesia EFKS i Mataupu-uta i Lefaga.
O le faatoanofotane o le afioga ia Fuatino Naomi, o le alo o Lemalu Tofilau Tafafao Le Mamea Avia Esera mai alalafaga o Mataulu Lefaga ma Iva, a o lona tina o Repeka Lemalu Tofilau Avia mai le alalafaga o Salamumu. Pagā lea, ua fai i lagi le folauga a le tina ua lē aulia mai ai le aso fiafia o si ona alo.
O le faatoafaiavā o le afioga ia Fonoti Foaga, o le alo o Talaitupu Nuu ma le faletua mai le alalafaga o Lalomauga i Anoamaa.
O le tamaitai faaipoipo e faigaluega i le Ofisa o Aoga, a o le alii faaipoipo e faigaluega i le EPC. Sa taitaia le sauniga e le faafeagaiga, Susuga Lauama Fonotaga. O le susuga i le faafeagaiga ia Lauama Fonotaga ma le faletua ia Elieta Fonotaga, o loo la tausia le ekalesia i Matautu-uta i Lefaga.
O le upu folafola a le Atua auā se timaiga mo le aiga fou, na fofogaina e le susuga i le faafeagaiga ia Esaroma Fatilua. O le susuga Esaroma ma le faletua ia Ruta Fatilua o loo la tausia le ekalesia EFKS i le pitonuu i tai poo Matautu-tai i Lefaga lava. Tau ina ia aogā afioga a le Atua e fai ma taiala e faavae ai le aiga fou mo le lumanai.
O le uo sili tamaitai, o Telesia Lemalu Tupe Le Mamea Avia, a o le uo sili alii, o le susuga Lafaele.
E toasefulutasi aumea mamae alii, o i latou uma e nonofo i Samoa. Ae o aumea mamae tamaitai e toasefulutasi foi, o nisi sa malaga atu i Ueligitone, o le isi toafā na malaga atu mai Aukilani, ma le isi toaono e nonofo lava i Samoa.
Na mae‘a le sauniga ona alo lea e tali le faaaloalo e ala i le faainu o le asikulimi ma ona teuga eseese a le tina o le galuega ia Elieta ma le mamalu o le mafutaga a tina, a o lei agai atu le ulugalii fou ma la aumea mamae ma uo sili mo le latou tafaoga i le Matareva Beach.
O le taumafataga sa faia lava i le maota o le tamā ma le aiga o le tamaitai faaipoipo, sosoo ai ma faafiafiaga sa alo atu i ai le auvalaaulia ma fanau a le aiga o le tamā o le tamaitai faaipoipo mai Niu Sila, Ausetalia ma Samoa.
Na taualuga e Sa Fuatino ma le afioga a le tamaitai matua, afioga ia Tala Tiumalu Le Mamea Vatulele o ē o loo ave i ai le faaaloalo a Sa Fuatino, a o gasegase ai le afioga a Toelau Tiuli Lemalu Faigā.
Na sosoo ai ma faaaloaloga o le aso e pei ona masani ai Samoa; sa muamua lava le aufaigaluega Paia a le Atua i susuga i faafeagaiga. E tusa ma 15 faafeagaiga sa auai i le aso fiafia o le aiga fou mai soo se fata faitaulaga, aemaise foi le paia ia Sa Fuatino le afioga i le tamaitai matua.
Na auai foi nisi o sui mai a la matagaluega o loo galulue ai, le Ofisa o Aoga ma le EPC; e lē gata i lea, o tupu ma tamalii ma le mamalu o Samoa potopoto sa latou talisapia le valaau atu a le aiga fou.
Na taualuga i fesagaiga o Paolo auā lava alofaaga molioo mo le aiga fou, ona ta‘ape ai lea o le fuamanusina, ma lele le gogo ma si ana i‘a. O le agaga o le faafetai tele ma ia faatutumu atu e le Atua mea ua faagaogaoina ona o lo outou alofa tulai.
Tau ina ia faamanuia le Atua i le aiga fou, ma ia fuatele le niu.
