O se tasi lenei o atinae masalo o lea ua savalia nei poo ua agai atu foi i le 6 tausaga talu ona faavaeina lenei atinae lelei i mea tau taaloga faapea ai foi ma le Matagaluega o taaloga i le tau faafaileleina o le taaloga o le lakapi i totonu o aoga, ma o se polokalame ua amata ona vaaia ma molimauina lona agaigai pea i luma. I le taimi nei sa talimalo ai foi le Iuni lakapi a le Aukilani Samoa i le Au filifilia mai Samoa i le U12 faapea se faamatalaga na filiina mai ia Samoa atoa i alo ma fanau aoga o loo fiafia i lenei taaloga, na matuai faatumulia le malae i Aorere Park i le aoauli i le maimoaina lea o le toe taaloga i le va o Otahuhu U12 faapea le Au masii mai Samoa U12, ma matuai si‘o atoa le malae i lea aoauli i le taupati mai o le atunuu e tapuaia lea taaloga faapea foi aiga o uo ma ē masani i le Au masii mai Samoa.
O loo faaauauina lea taamilosaga o tausaga taitasi, ma ua avea foi lea avanoa ma faavae ai le Ipu a le alii Palemia o Samoa ma auala ua siitia maualuga ai lea tausinioga ma ua vaaia ai foi le siitia o le tulaga ua oo i ai le Lakapi i le fanau talavou, na saunoa le Konesula o Samoa i Aukilani Faolotoi Reupena Pogi e faafetai le fanau ma le aumalaga atoa, ae sili le agaga faafetai ona o le matagofie o le taaloga i le matamata i lea aso ona o le taleni o loo i le tupulaga a Samoa, ma e le taumateina foi o nisi ia e sau aso avea ma sui o le Manu Samoa i aso o i luma.
O le taaloga foi i le faaiuga o le vaiaso o loo faafetaui mai le malaga mai i le vaitaimi tonu o loo faagasoloina ai le taamilosaga a le Aukilani Samoa, e le mafai ona aveesea le tulaga faafiafiaina tele i le fanau laiti i taleni, o tomai, faatinoga o le taaloga, o se amataga lelei tele lea i fuafuaga mamao, aemaise ai le siitia o lenei taaloga ua lauiloa ai Samoa i vasa e tele, faapea foi le tulaga ua seesee mālie atu agai i ai le sa o le atunuu o Samoa i atunuu o loo i le tumutumuga o nei taaloga.
Tasi lenei o vaega o loo faatinoina ma o loo lelei ai atunuu o loo i le tumutumu o le lakapi ona o loo amata mai lava i le taufaafaileleina i le fanau laiti faasolo mai ai lava ina ua oo atu i le vaega maualuga, le taumateina o le tulaga foi lea e seleseleina e Samoa i lenei taaloga pe a tumau pea ona faatāuaina polokalame mo fanau laiti faapenei ma aveaveai ai lava, ona mautinoa lea e lē toe oge Samoa i tama taalo lelei i le lumanai.
Ua toe taliu i Samoa le U12 a Samoa ina ua toe manumalo i le Ipu a le Palemia o Samoa, ma ua toe faafiafiaina foi le tapuaiga a le Palemia ina ua usitai le U12 e tatau ona toe foi atu le Ipu i Samoa.
