I faamaumauga o tupe a le Malo o Samoa mai i le tausaga faaletupe e pei ona taualuga ai i le aso 30 o Iuni 2017 na maua ai le oo atu i le silia ma le tasi le piliona le aofaiga atoa o ana nonogatupe (loans) na totogi, e aofia ai nonogatupe faavaomalo mai atunuu i fafo (Foreign Currency Borrowings) aemaise foi nisi o nonogatupe i totonu lava o le lotoifale o Samoa (Domestic Currency Borrowings).
O ia faamaumauga mo nonogatupe mai isi atunuu o loo ai silia ai le nonogatupe a le Malo o Samoa mai i le Malo o Saina lea ua faamauina le oo atu i le $410,011,643. O poloketi a le Malo o Samoa o faatupe ai mai i ana nonogatupe mai i le Malo o Saina e aofia ai le Parliamentary Complex MJCA Building, Government Building, National Medical, Samoa Medical, Samoa National Broadband Highway Project, Faleolo International Airport Upgrading Project.
O loo ta’ua foi i le pepa nei o faamaumauga nisi o nonogatupe poo loans a nisi o faalapotopotoga a le Malo lea e $29.6 miliona mai i faletupe e aofia ai Samoa National Provident Funds, Commercial Banks ma le Unit Trust of Samoa (UTOS). I faamaumauga o tausaga faaletupe o le 2015 na maua ai le totogi ai lea e le Samoa Airways o le $12.6 miliona agai i le UTOS, ese mai le isi $9.6 miliona na totogi foi i le UTOS i le 2016, ae o le 2017 na totogi ai foi e le Samoa Airways le isi $6.3 miliona i le UTOS. Peitai o le masina na tea nei na toe talosaga ai foi le Samoa Airways i se isi nonogatupe (loan) e $12 miliona mai le UTOS.
O isi faalapotopotoga a le Malo na totogi foi a latou nonogatupe agai i le S.N.P.F. o le pulega lea o le Malae Vaalele (Samoa Airport Authority), $1.19 miliona na totogi i le 2016, ae $823,857 na totogi i le 2017. E oo lava foi i le Faletupe o Atina’e a Samoa (Development Bank) na totogi foi lana loan e $11.3 miliona i le UTOS i le tausaga faa le tupe 2016, ao le 2017 e $9.7 miliona.
O le kamupani vaa o le Pacific Forum Line na totogi foi lana nonogatupe e $15.4 miliona i le UTOS i le tausaga faaletupe o le 2016, ae $12.0 miliona na totogi i le 2017. O le kamupani vaa a Samoa le Samoa Shipping Services na ia totogi foi le $1.08 miliona o lana nonogatupe i le S.N.P.F. i le 2016 ma le $456,779 na totogi foi i le S.N.P.F.. i le 2017.
O le tele o nei faamaumauga e lē o maua ai pe fia sa’o se aofaiga atoa o nei mau nonogatupe peitai o loo manino lava le faaauau pea ona totogi o nei nonogatupe i tausaga taitasi. I le maitau foi mai i le tausaga e 2013 agai mai i le 2017 o loo faamauina ai le siitia pea o nonogatupe a le Malo o Samoa peitai o loo mafai lava ona faaauau lona totogiina.
Ta’ua foi e le Afioga i le Alii Palemia, Tuilaepa Sailele Malielegaoi, e lē o iai se alofaga a le faigamalo mai i ana nonogatupe, ma e leai foi se mea o le a nanā ai e le Malo mai i tagata lautele, o loo mafai lava ona maua faamaumauga uma o nei nonogatupe mai i le faletupe tutotonu a Samoa ina ia faitau ma malamalama iai soo se tagatanuu sitiseni Samoa.
Soo se Malo lava e faalagolago lona atina’e i lafoga a tagata faigaluega faatasi ai ma ana nonogatupe mai i ana paaga faavaomalo, e le tāua la le tele o se nonogatupe ae e tāua tele le mafai ona toe totogi o nei nonogatupe e pei ona faia ai e le Malo i le taimi lenei, saunoaga lea a le Palemia.
O le tele foi o nei nonogatupe faavaomalo o loo mafai ona totogi i se taimi umi e oo atu i le 30 tausaga ma atili laititi ai lava le interest poo tupe tului. Fai mai Tuilaepa, e lē o iai ma se popolega o le Malo o Samoa i nei loans ona o loo sologa lelei mea uma e ala i le toe totogiina o nei loans.
