Ina ia taofiofi mai ile fale tina ma tamā e masani ona o e taaalo bingo i nofoaga faitele, ia maua ai pea le mafutaga ma fanau ma le aiga, ma faaitiitia ai sauaga eseese i fanau i taimi e alu ai le matua ile Bingo, lea ua faatuina ai nei ele Sooula se matatia i Samoa, ole faa bingo uma o tina ma tamā ile latou lava fale, ile TV Bingo.
E amata lenei faiga ile Aso Gafua 18 Setema, ile 9:30 ile po i luga ole TV1. Ole Sooula Traders lea ua lauiloa ile faatau atu ma le faatau mai iai o oloa mo faalavelave e pei o pusa apa ma ietoga, ae o ana taavale rent, ma lana auaunaga mo femalagaa’iga.
Ole pisinisi lea ale Susuga Bismark ma le faletua ia Leilani Tamati. O pepa bingo e faatau tasi mai le faleoloa ole Sooula ile $20tala ile paketi. Ole uluai “TV Bingo lenei ole a faanofo filemu ai mātua ile fale. Ia maua ai pea le mafutaga a tina ma le fanau, ae taaalo faatasi ai ma tamā ae o fanau e fai meaaoga. Ole TV Bingo ua faaalu ai i luga ole “Sina upu alofa Trust” i lalo ole faamalu ale Sooula Traders, e pei ona faamatala lana sooupu, le susuga a Mandy Sititi.
Sailia mafuaaga o sauaga ele ofisa o Sulufaiga
E ui o lea ua tali mai le Sooula ise tasi o auala e fofo ai isi mafuaaga o sauaga i totonu o aiga, ae ole saga vailiilia pea o isi mafuaaga o sauaga lea ua valaau faalauaitele ai nei le Ofisa o Sulufaiga i tagata na aafia i Sauaga, ma tagata lautele e fia faasoa manatu i lenei lava mataupu. Ole suesuega ale Commision of Inquiry ua tofia faapitoa nei, e taitaifono ai le Komesina o Sulufaiga, Afioga ia Maiava Iulai Toma, ma lana au suesue ia: Falenaoti Mulitalo Kolotita June Ailuai Oloialii Peresetene ole komiti a tina o Vavau, Tagaloatele Professor Peggy Fairbairn-Dunlop Polofesa o Suesuega tau ile Pasefika, Meleisea Leasiolagi, Professor Malama Meleisea, ole Faatonu o suesuega ole gagana Samoa, NUS Iunivesite aoao a Samoa ma le tofa a Tolofuaivalelei Falemoe Leiataua-Lesa, sa avea ai ma faipule mai le itumalo o Aana Alofi Nu.2, ae sa avea ai foi ma Minisita ile Matagaluega a Tina ma Tamaitai ma Aga Fesootai.
Peitai faamaumauga ale Toomaga mo ē Puapuagatia o iloa ai ole toatele lava o fanau oloo sauaina, o tagata lava o o latou aiga, e aofia ai mātua, o tauaiga ole tina poo le tamā. O na sauaga e aofia ai feusuaiga le manaomia ma maua ai ni pepe e le o manaomia foi e aiga ona ole va lava lea faaleaiga.
O nisi o na pepe ua vaetama atu ini aiga papalagi i lalo o maliega a tina o pepe ma se vaega o aiga, e ola ai ma manuia ai o latou olaga. Ua molimauina foi o na tamaiti e le gata ina maua pea sootaga ma le pulega ole Toomaga ae oloo fai lava ma malaga mai ma o latou mātua palagi e asiasi mai i Samoa.
Ole Aso Gafua ole vaiaso nei, 18 Setema ua amata ai lea suesuega faatalatalanoa faalauaitele ile fale fono ale malo, le TATTE Tui Atua Tupua Tamasese Efi, ma le vaiaso atoa lenei e faatalanoa ai ma faasolo atu ai i nuu i tua i Upolu nei, faapea le motu tele i Salafai, e sailia le mafuaaga o sauaga i totonu aiga. Ua faailoa mai foi e pule lava le tagata o lea faatalanoaina ele Komisi, pe faalauaitele lana faamatalaga, pe faalilolilo.
Ae ese foi le fofo ale Church of Chirst o Amerika Samoa i Sauaga
“E leai lava se isi auala sili e fofo ai aafiaga o fanau sa sauaina ma manumalo mai ai, nai lo le vaai i luga ma le vaai i luma. Pei ona alagaina e tagata lotu ole Church of Christ Amerika Samoa, ile lotoā e Toomaga iai ē Puapuagatia i Tunaimato ile amataga ole vaiaso.
E lata ile 20 matua ma fanau, taitaia e Pastor Sione na latou molimauina mole taimi muamua auala ale Atua ua na laveai ai ola ole fia selau o fanau a Samoa na sauaina e o latou lava aiga. O viiga ma feofoofoaiga a Pastor Larry na molimauina, ua ose faamanuiaga e le gata ile aulotu ae o fanau manumalo.
Na talanoa Pastor Larry e ui o fesouaiga na oo iai nei fanau, ae e le tatau ai lava ona galo le Atua soifua, e ao ai lava ona vaai i luga ma vaai i luma. Ae ile tulai mai ole TV bingo ale Sooula, ua fesiligia ai foi e isi, le ole auala lea ole a aoao ai ma le taalo faitupe a tamaiti, auā e tasi lava le tv, ua atili ai ona tele le aafiaga, ua le sauaina ai nao le fafine ae ua aafia ai ma le aiga atoa. Auā e fia iloa uma lava e tagata lea mea fou, ae e mafai lava e tamaiti ona omai faatau pepa, ma saofafai ai.
Ole fesoasoani ale Sooula, pei ona agia ai, ole latou TV Bingo ua ose tasi lea o auala fofo poo se fesoasoani ile faafitauli o sauaga i aiga, ia aumai faatasi ai aiga, ae ole galuega e faia faatasi a matua ma tagata uma lava ole tatou atunuu le faaitiitia o sauaga.
